युरोपा लिगः सेभिया र स्पान्योल नकआउट चरणमा

68
  •  
  •  
  •  

एजेन्सी । युरोपा लिगमा स्पेनिस क्लब सेभिया र स्पान्योल नकआउट चरणमा पुगेको छ ।
समूहको चौथो खेलमा सेभियाले एफ ९१ डुडेलाङ्गेलाई ५–२ ले हराएको हो ।

डुडेलाङ्गेको मैदानमा भएको खेल सेभियाका लागि मुनिरले ह्याट्रिक गरे । मुनास डाबरले पनि दुई गोल गरेका थिए ।
खेलको १७ औं मिनेटमा डाबरले गोल गर्दै सेभियालाई अग्रता दिलाए । २७ औं र ३३ औं मिनेटमा मुनिरले गोल गर्दा सेभियाले अग्रता ३–० मा लम्ब्यायो । त्यसको तीन मिनेटपछि डाबरले ब्यक्तिगत दोस्रो गोल गरेपछि सेभियाले पहिलो हाफमा चार गोलको अग्रता लियो ।

६६औं मिनटमा डाबरको पासमा मुनिरले ह्याट्रिक पूरा गरे भने सेभियाले ५–० को अग्रता थियो ।

पहिलो हाफमा निरिह बनेको डुडेलाङगेले ६९औं मिनेटमा खाता खोल्यो । डानेन सिनानीले गोल गरेका थिए । ८० औं मिनेटमा सिनानीले फेरी गोल गर्दा डुडेलाङ्गेले सेभियाको अग्रता ५–२ मा छोट्यायो । तर बाँकी समयमा गोल हुन नसक्दा सेभियाले नकआउट चरणमा स्थान सुरक्षित र्गयो ।

चार खेलमा स्पष्ट जित हात पारेको सेभिया १२ अंक बनाउँदै अन्तिम ३२ मा स्थान बनाउन सफल भएको छ ।

स्पान्योलले बुल्गेरियाको लुडोगेरेट्सलाई ६–० को भारी अन्तरले हरायो । घरेलु मैदानमा भएको खेलमा ला लिगाको रेलिगेसन जोनमा रहेको स्पान्योलले बुल्गेरियाको शीर्ष डिभिजनको क्लबलाई खेलभरी नै दबाबमा राख्यो ।

स्पान्योलको जितमा मेलेन्डो, लुइस लोपेज, माटियास भर्गास, भिक्टर काम्पुजानो, एड्रिया पेद्रोसा र फाकुन्डो फेरेराले गोल गरेका थिए ।

पहिलो हाफमा नै दुई जना खेलाडीले रातो कार्ड पाएपछि दबाबमा परेको लुडोगोरेट्सको पनि नकआउट चरणमा पुग्ने सम्भावना कायम छ । लुडोगोरेट्सका राफेल फोस्टरले १२ औं मिनेटमा र गोराल्स्कीले ३४औं मिनेटमा रातो कार्ड पाएका थिए ।


  •  
  •  
  •