निर्वाचन आयोगमा कांग्रेस उम्मेदवारको प्रचार गर्ने नियत देखियोः एमाले

सार्वजनिक रुपमा क्षमायाचना गर्न र आयुक्तलाई कारवाही गर्न माग
388
  •  
  •  
  •  

काठमाडौँ, १७ मंसिर : निर्वाचन आयोगले विभिन्न १० टिभी स्टेशनबाट प्रसारित गर्ने गरी सञ्चालित मतदाता शिक्षा अन्तर्गतको ‘इलेक्सन क्विज’ कार्यक्रमप्रति एमालेले गम्भीर ध्यानाकर्षण गरेको जनाएको छ ।

‘अभिनेता राजेश हमालद्वारा प्रस्तुत गरिएको उक्त क्विजमा निर्वाचन आयोगले कांगे्रसका उम्मेदवारको प्रचार गर्ने नियतसहित ‘तीन २ उम्मेदवार कहाँबाट उठेका छन्’ भन्ने प्रश्न राखिएको छ । हाम्रो पार्टी सत्ताधारी दलको खास उम्मेदवारलाई निर्वाचन आयोगको उम्मेदवारको रुपमा प्रस्तुत गरिएकोमा आपत्ति जनाउँदै निष्पक्ष भनिएको निर्वाचन आयोगले कुन–कुन उम्मेदवारको पक्षमा प्रचार अभियान सञ्चालन गर्न खाजेको हो, स्पष्ट पार्न आग्रह गर्दछ ।’ निर्वाचन परिचालन कमिटीका प्रवक्ता विष्णु रिमालले जारी गरेको प्रेस नोटमा भनिएको छ ‘यदि त्यो प्रचार सामग्री निर्वाचन आयोगको जानकारी बेगर भएको हो र मतदाता शिक्षाको जिम्मा लिने आयुक्तको निजी निर्णयमा भएको हो भने आयोगलाई सार्वजनिक रुपमा क्षमायाचना गर्न र निज आयुक्तलाई तत्काल कारवाहीको लागि माग गर्दछ ।’

आयोगको मौनता वा निर्णयको ढिलाईलाई संस्थागत धाँधलीको प्रक्रियामा आयोग संलग्न रहेको निष्कर्षमा पुग्न बाध्य हुने समेत एमालेले जनाएको छ ।


  •  
  •  
  •