शिखर सम्मेलनको लागि ‘बुलेटप्रुफ’ कार भारतबाट

63
  •  
  •  
  •  

काठमाडौं, ११ असोज : दक्षिण एसियाली क्षेत्रीय सहयोग संगठन (सार्क)को १८ औ शिखर सम्मेलनको लागि राष्ट्र एवं सरकार प्रमुखको लागि चाहिने आरमदायी र अति सुरक्षीत ‘बुलेटप्रुफ’ कार भारतबाट भाडामा ल्याउने भएको छ । भारतीय विदेश मन्त्रालयलाई आवश्यक पर्दा उपयोगमा लिने पर्यटन विभाग अन्तरगतको ‘टुरिजम ब्यूरो’बाट नै नेपालले पनि त्यस्तो कार सार्कको लागि ल्याउने तयारी अघि बढाएको हो । भारतले आफ्नो मुलुकको भ्रमणमा आउने विशिष्ट अधिकारीका लागि त्यहीबाट कार भाडामा लिने गर्दछ । सरकारसंग रहेको कार संरक्षण नहुने भएपछि पछिल्लो चरणमा भारतले पनि भाडामा लिने गरेको परराष्ट्र अधिकारीहरुले बताए ।

दुवै मुलुकको सरकारी स्तरमा नै छलफल गरेर उक्त कार भाडामा ल्याउने तयारी अघि बढेको हो । अगामी मंसिर १० र ११मा काठमाडौंमा हुने १८ औं शिखर सम्मेलनको तयारी बारेमा सदस्य मुलुकको राजदूतलाई जानकारी गराउन भारत गएको सहसचिव नेतृत्वको टोलीले भारतीय विदेश मन्त्रालयको सहयोगमा त्यस्तो ‘डिल’ गरेर फर्केको परराष्ट्र मन्त्रालय उच्चस्रोतले बतायो ।

शिखर सम्मेलन आफ्नो मुलुकको नेतृत्व गरेर आउने राष्ट्र एवं सरकार प्रमुखहरुलाई आवश्यक पर्ने सुविधा सम्पन्न कार सरकारसँग छैन् । राष्ट्रपति रामवरण यादब र प्रधानमन्त्री सुशील कोइरालाले अहिले उपयोग नै गरिहरको बाहेका त्यस्ता तीनकार आवश्यक मर्मत विना सिंहदरबार र नारायणहिटीमा थन्किएको छ । प्रधानमन्त्री कार्यालयको लामो दवावपछि त्यो कार मर्मत गरेर ‘स्पयेर्स’को लागि भए पनि राख्ने तयारी परराष्ट्रले अघि बढाएको छ । नयाँ गाडी पनि विग्रन सक्ने हुनाले त्यसको स्थानमा अर्को उपयोग गर्नका आठ गाडी प्रयोग भइरहेको अवस्थामा कम्तीमा तीन गाडी स्पयेर्स चाहिन्छ ।

प्रक्रियामा अवरोध नआए भारतबाट आठ वटा त्यस्तो गाडी नेपाल ल्याउने निर्णय परराष्ट्र अधिकारीहरुले गरिसकेका छन् । विएमडब्लु वा मर्सिडीज कुन गाडी खरिद गर्ने विवाद समेत चलिरहेकेा अवस्थामा भाडामा ल्याउदा भने सरकारले जर्मनीका दुवै कम्पनीको चार-चार गाडी ल्याउने तयारी समेत रहेको एक अधिकारीले बताए । ‘टुरिजम ब्युरो’मा मर्सिडिज र विएमडब्लु दुवै गाडी रहेकाले मिलाएर ल्याउने सम्मको छलफल भएको अधिकारीले बताए । त्यसबाहेक अन्य केही गाडीहरु पनि भारतबाट नै भाडामा ल्याउने तयारी छ । सबै कालो गाडी हुने हुनाले ल्याउने गाडी पनि कालो नै रहनेछ । कालो र चिल्लो गाडी उस्तै स्तरमा सडकमा गुडाउने तयारी परराष्ट्रको छ, एक अधिकारीले बताए । सार्कको लागि एक सय ३० गाडी आवश्यक पर्छ । अर्थमन्त्रालयले २४ गाडीको मात्र स्विकृत दिएकोले त्यसको टेण्डर भएको परराष्ट अधिकारीले बताए । केही गाडी विभिन्न मन्त्रालयको पनि उपायोगमा ल्याउने तयारी छ । कतिपय मन्त्रालयले आफूसंग गाडी नभएको जानकारी परराष्ट्रलाई पठाईसकेको छ ।

टोलीमा गएका एक सदस्यका अनुसार गाडीको बारेमा भारतीय दूतावाससंग छलफल गरेर नै बुझ्न गएका हौ । अव कसरी ल्याउने भन्ने विषयमा पनि भारतीय दूतावाससँग बसेर छलफल हुनेछ । परराष्ट्रमन्त्री महेन्द्रबहादुर पाण्डे र निमित्त सचिव शंकरदास बैरागी फर्के लगत्तै भारतसंग भएको छलफल र गाडीको बारेमा जानकारी गराएर यसको निर्णय लिने तयारी रहेको परराष्ट्र अधिकारीको छ ।

सहसचिव प्रकाश सुवेदीको नेतृत्वमा गएको उक्त टोलीले त्यसको एक प्रतिवेदन नै मन्त्रालयलाई बुझाउनेछ । ‘हामी खास गरि यहाँ दुतावास नभएको मुलुक माल्दिभ्स, भुटान र अफगानिस्तानका राजदूतहरुलाई सार्कका तयारी बारेमा जानकारी गराउन गएका थियौ । सोही अवसरमा गाडीको बारेमा बुझ्ने काम भएको हो ,’ टोली प्रमुख सुवेदीले कान्तिपुरलाई बताए । उनले भने अहिले यो गर्ने वा त्यो भन्ने टुंगो भएको छैन विभिन्न विकल्पको लागि त्यहाबाट गाडी भाडामा ल्याउने विषय पनि एउटा विकल्प रहेकोले त्यो बुझ्ने काम भएको हो ।

टोलीका एक सदस्यका अनुसार भने भारतबाट गाडी ल्याउने प्रायः निश्चित नै हो भन्ने कि नभन्ने भन्ने मात्र हो । गाडी गुडाएर वा लरीमा राखेर ल्याउने की प्लेनबाट ल्याने भन्नेमा छलफल समेत अघि बढिरहेको ती सदस्यले बताए । गाडी ल्याउने र फर्काइदिएको खण्डमा भारतले चालक सहित उक्त गाडी नेपाल सरकारलाई सहयोग स्वरुप निश्चित परियोजनको लागि उपलब्ध गराउने गरि पनि छलफल भइरहेको छ ।

परराष्ट्रले बेलायतमा ओलम्पीक ताका प्रयोग गरिएको पुरानो गाडी खरिद गर्ने गरि प्रक्रिया अघि बढाएको भए पनि त्यो विकल्प विवादीत हुने भए पछि अन्य खरिदको लागि समय लाग्ने भन्दै भाडाको विकल्पमा गएको हो । छिमेकी मुलुकद्धयले शिखर सम्मेलनको लागि आवश्यक सहयोग समेत गर्ने भनिसकेकोले यस्तो अवस्थामा गाडी पूर्ण सहयोगमा समेत मिल्न सक्ने एक अधिकारीले बताए । शिखर सम्मेलनको तिथी नजिकिदै गर्दा सबै क्षेत्रमा तिव्ररुपमा तयारी अघि बढिरहेको छ ।

कान्तिपुर दैनिकबाट


  •  
  •  
  •