काठमाडौं, २३ चैत (ओएनएस) : आइतबार उपचारको क्रममा निधन भएका एमाले नेता रामनाथ ढकालको पार्थिव शरिरलाई सोमबार पार्टी कार्यालयब बल्खुमा अन्तिम श्रद्धाञ्जलीको लागि राखिएको थियो ।
एमालेका प्रभावशाली नेता मध्येका एक ढकाललाई अन्तिम विदाइ गर्न एमालेका नेता, कार्यकर्ता, शुभेच्छुक तथा अन्य पार्टीका नेताहरु उपस्थित भएका थिए । ढकाललाई पार्टीका अध्यक्ष केपी ओलीले पार्टीको झन्डा ओढाई श्रद्धाञ्जलि अर्पण गरेका थिए । यस्तै संविधानसभाका अध्यक्ष सुवास नेम्वाङ, पार्टीका वरिष्ठ नेताहरु झलनाथ खनाल, माधवकुमार नेपाल थिए ।
यस्तै, स्थानीय विकास मन्त्री तथा कांग्रेस महामन्त्री प्रकाशमान सिंह, कांगेस नेता अर्जुननरसिंह केसी, राप्रपा नेपालका अध्यक्ष कमल थापा, एमाओवादीका नेता टोपबहादुर रायमाझीलगायतका नेताहरूको बल्खुमा उपस्थिति थियो ।
श्रद्धाञ्जलीको क्रममा नेता, कार्यकर्ता भक्कानिएका थिए । सभाध्यक्ष नेम्वाङ, नेतृ अष्टलक्ष्मी शाक्य लगायतका नेताहरुले ढकालको मृत्युको शोकमा आँशु थाम्न सकेनन् । सोमबारनै पशुपति आर्यघाटमा अन्तिम दाहसंस्कार गरिनेछ ।