चितवन, २७ असार (ओएनएस) चितवनमा १३ वर्षीया एक बालिकाले बच्चा जन्माएकी छिन् । जबर्जस्ती करणीमा परेकी ती बालिकाले भरतपुर अस्पतालमा बच्चा जन्माएकी हुन् । बालिका र नवजात शिशुको अवस्था राम्रो रहेको उनलाई संरक्षण गर्दै आएको संस्था असहाय महिला तथा बालबालिका पुनःस्थापना केन्द्र आदर्शगृहकी कार्यकारी निर्देशक मीना खरेलले जानकारी दिइन् ।
चितवनको कठारका चन्द्रबहादुर क्षेत्री रखलको जबर्जस्ती करणीमा परेर १३ वर्षीया बालिकाले जन्माएको बच्चा आदर्शगृहले एसओएस बालग्रामलाई पालनपोषणका लागि पठाइएको खरेलले शुक्रवार आज जानकारी दिनुभयो । बालिकाको रिवारको आर्थिक अवस्थासमेत कमजोर भएकाले बालकल्याण समिति, भरतपुर अस्पताल, चितवन प्रशासनको रोहबरमा आदर्शगृहले नवजात शिशुलाई संरक्षणका लागि एसओएस बालग्रामलाई हस्तान्तरण गरेको हो । गएको दसैँताका उनी जबर्जस्ती करणीमा परेको पारिवारिक स्रोतले जनाएको छ ।
बच्चा गर्भ रहेको करिब आठ महिना पछिमात्रै रहस्य बाहिर आएपछि सरकारी पहलमा विगत एक महिनादेखि बालिका आदर्शगृहको संरक्षणमा रहेकी थिइन् । पेटमा ग्यास्टिक भएको भनि जँचाउन आउँदा बालिका गर्भवती भएको पत्तालागेको थियो । जबर्जस्ती करणीको आरोपमा चन्द्रबहादुरविरुद्ध आदर्शगृहकै पहलमा परिवारले अहिले जिल्ला प्रहरीमा उजुरी दिएका छन् ।
उजुरीको आधारमा पक्राउ गरी अनुसन्धान थालिएको जिल्ला प्रहरी कार्यालय चितवनले जनाएको छ । उनले करणी गरेको स्वीकार गरेको स्रोतले बताएको छ । यसअघि गएको भदौमा समेत चितवनकै अर्की एक बालिकाले पनि करणीमा परेर बच्चा जन्माएको आदर्शगृहका सूचना तथा सञ्चार संयोजक अर्जुन अधिकारीले बताउनुभयो । गृहमा अहिले पनि हिंसा प्रभावित २३ जना महिला तथा बालिका छन् ।
करणी गर्ने जुटपानीका रामराजा खनाललाई जिल्ला अदालत चितवनले ११ वर्ष तीन महिना कैद र ४० हजार क्षतिपूर्तिको फैसला सुनाएको अधिकारीले बताउनुभयो । हाल चितवनको एसओएस बालग्रामको संरक्षणमा यस्ता असहाय बालबालिका ११४ जना रहेको निर्देशक भोलानाथ पौडेलले जानकारी दिनुभयो ।
