काठमाडौँ, १२ फागुन(ओएनएस) : बेलायती राजकुमार ह्रयारी नेपालको भ्रमण गर्ने भएका छन् । राजकुमार ह्यारीले मार्च २० देखी २३ सम्म नेपालको औपचारिक भ्रमण गर्ने तय भएको किङ्सटन प्यालेसले जनाएको छ ।
किङ्सटन प्यालेसले बिहीबार ट्वीट गर्दै ह्यारीले नेपालको ४ दिने औपचारिक भ्रमण गर्न लागेको पुष्टी गरेको हो । ह्यारी नेपाल भ्रमण गर्ने यो वर्षको सुरूमा नै जानकारी दिइएपनि मिति भने बिहीबार घोषणा भएको हो । भ्रमणका क्रममा हृयारीले राष्ट्रपति विद्यादेवी भण्डारीसँग भेटवार्ता गर्ने छन् । साथै उनले भूकम्प पीडितहरुलाई भेट्ने र उनीहरुको अवस्थाबारे जानकारी लिने कार्यक्रम पनि तय भएको छ ।
प्यालेसका अनुसार उनले पोखरास्थित गोर्खा सैनिक क्याम्पको भ्रमण समेत गर्ने छन् । त्यस क्रममा उनले भूकम्प प्रभावित पूर्व गोर्खा सैनिकहरुको अवस्थाबारे समेत जानकारी लिनेछन् ।
साथै उनले एक नेशनल पार्कको भ्रमण गर्ने र ट्रेकिङ समेत जाने छन् । किङ्सटन प्यालेसले जारी गरेको विज्ञप्तिमा भनिएको छ, नेपाल भ्रमण गर्ने अरुले जस्तै राजकुमार हृयारी पनि प्राकृतिक सुन्दरताको आनन्द लिन उत्सुक छन् ।’
