काठमाडौं, २३ पुस (ओएनएस) : एमाओवादी अध्यक्ष पुष्पकमल दाहाल प्रचण्डले माघ ८ मा पहिलो मस्यौदा जारी गर्न सकिए पनि संविधान जारी गरेसरह हुने बताएका छन् ।
युवा सभासदहरुले निर्धारित मिति माघ ८ मै संविधान जारी गर्नको लागि दबाब दिन भेटेपछि प्रचण्डले संविधान जारी गर्न आफु दृढ रहेको बताउँदै तोकिएको मितिमा पहिलो मस्यौदा ल्याउन प्रयास भैरहेको बताएका हुन् ।
युवा सभासद्का तर्फबाट एमालेका प्रकाश ज्वालाले माघ ८ मा नै पूर्ण संविधान जारी गर्नुपर्ने माग सहितको ज्ञापनपत्र अध्यक्ष प्रचण्डलाई बुझाएका थिए ।
भेटमा प्रचण्डले भने ‘माघ ८ सम्ममा पहिलो मस्यौदा जारी गर्न सकियो भने पनि संविधान जारी गरेसरह हुन्छ । संविधानसभाका निम्ति आफ्नो दलले ठूलो बलिदान गरेकाले संविधानसभाबाट संविधान जारी नगर्ने विषयमा कहिल्यै कल्पना गर्न सकिन्न । ’
गणतन्त्रका उपलब्धिलाई संस्थागत गर्ने तथा समाजका सबै वर्गका आकाङ्क्षा सम्बोधन हुने गरी समयमै संविधान जारी गर्नुपर्नेमा उनले जोड दिए ।
