‘प्रधानमन्त्रीको पहिलो विदेश भ्रमण भारत’

143
  •  
  •  
  •  

काठमाडौं २३ पुस । परराष्ट्र तथा उपप्रधानमन्त्री कमल थापाले प्रधानमन्त्री केपी शर्मा ओलीको पहिलो विदेश भ्रमण भारतबाट आरम्भ हुने बताएका छन् ।

रिपोर्टर्स क्लबले आज यहाँ आयोजना गरेको साक्षात्कारमा उहाँले दुवै छिमेकीसँगको सम्बन्ध समानता र पारस्परिक हितका आधारमा अघि बढ्ने बताउँदै प्रधानमन्त्री ओलीको भारत भ्रमणका लागि प्रारम्भिक तयारी सुरु भइसकेको जानकारी दिए । यद्यपि कुन मितिमा भारत भ्रमण हुने हो भन्नेबारेमा भने केही बताएनन् ।

उनले नेपाल–भारत सीमा नाकामा देखिएको असमझदारी हट्दै गएकाले वीरगञ्जबाहेक सबै नाका सहजरुपमा सञ्चालनमा रहेको जानकारी दिए ।

परराष्ट्रमन्त्री थापाले नेपाल भारत र चीनको आर्थिक करिडोर केन्द्रबिन्दु बनाउन सके देशले निकै छिटो समृद्धि हासिल गर्न सक्ने विश्वास व्यक्त गरे । उनले विभिन्न मुलुकमा चाँडै राजदूत नियुक्ति गरिने जानकारी पनि दिए ।

तराई मधेसमा संविधानका विषयलाई लिएर आन्दोलनमा उत्रेका संयुक्त लोकतान्त्रिक मधेसी मोर्चासँगको वार्ता निष्कर्षतर्फ उन्मुख रहेको बताउँदै उपप्रधानमन्त्री थापाले भने – “समस्या समाधानका लागि खाका तयार हुँदै गएको छ ।”

परराष्ट्रमन्त्रीका हैसियतले आफूले आर्थिक कूटनीतिलाई प्राथमिकतामाराखेर काम गरिरहेको उल्लेख गर्दै उनले त्यो लक्ष्य प्राप्त गर्न संरचनागत र नीतिगत सुधारमा जोड दिइएको बताए।


  •  
  •  
  •