काठमाडौ, १७ मंसिर(एजेन्सी) : अष्ट्रेलियाको युवा क्रिकेटर फिलिप हग्सको आझ अन्तिम संस्कार गरिँदैछ । उनको अन्तिम संस्कार उनको गृहनगर म्याक्सभिलेमा गरिने अन्तराष्ट्रिय सञ्चारमाध्मयहरूले जनाएका छन् ।
हग्सको शव उनको बाल्यकालको स्कुल म्याक्सभिले हाई स्कुलमा राखिएको थियो । हग्सको परिवारहरूले उनको जिन्दगीसँग जोडिएका यादगार पलहरूको बयान गरेका थिए । कप्तान माइकल क्लार्कको भाषण निकै भावुक थियो । उनले भने, ‘मलाई अहिले पनि फिलिप हग्स नजिकै भएको अनुभव हुन्छ । यदी यसलाई नै आत्मा भनिन्छ भने फिलिपको आत्मा मसँगै छ ।’ क्लार्क यस्तो भनिरहँदा आँशु पुछिरहेका थिए ।
स्कुलबाट फिलिपको शव उनका पितासहित कप्तान माइकल क्लार्क र आरोन फिन्च तथा केही साउथ अष्ट्रेलियाली क्रिकेटरहरूले उठाएका थिए । शव उठाऊँदा पनि क्लार्क र फिन्च रोइरहेका थिए ।
हग्सको दाई नीनो रैमुन्नो ले फिलिपको सम्झनालाई ताजा गरे । उनले कसैलाई थाहा नभएका कुराहरु समेत उक्त समयमा खुलासा गरे । नीनोले भने, ‘हग्सको क्रिकेटमा आउनुको पछाडि उनका ठुला दाई जेसनको निकै ठुलो हात थियो । हग्स क्रिकेटमा कुनै रूची राख्दैनथे । जेसनको अण्डर-१० टीमलाई एक खेलाडीको खाँचो थियो । उनले आफ्नो भाई हग्सको नाम लिए, तर हग्सले खेल्न मानेनन् । जेसनले उनलाई सम्झाए की उनी वैकल्पिक खेलाडी हुनेछ र उसलाई धेरै मेहेनत गर्नुपर्ने छैन् । जेसनले सम्झाएपछि हग्सले क्रिकेट खेल्न स्विकार गरे । उनले आफ्नो पहिलो खेलमा २५ रन बनाएका थिए ।’
उनले थपे, ‘समय बित्दै जाँदा उनीहरू पनि ठुलो हुँदै गए, जेसन हग्सको खेलका बारेमा धेरै कुरा सिकाउँथे । जेसनले आफ्नो भाईलाई घण्टौसम्म पनि ब्याटिङ एभरेज कसरी कायम गर्ने भन्ने विषयमा सिकाउँथे तर, हग्सले यस्ता कुरा बुझ्दैनथे ।’
फिलिपका पिताको कुरा गर्दै नीनोले भने, ‘फिलिपका पिता ग्रेग हग्सको ब्याटिङ अभ्यासका लागि घण्टौ बलिङ गर्थे । यसरी ग्रेगले बलिङ गरेको देखेर क्रिकेट क्लबले बलिङका लागि मेसिन किन्यो । हग्सको सफलतामा उनका पिताको पनि हात छ ।’
