बलात्कारको घटना पाँच सयमा मिलापत्र, ६ जना पक्राउ

135
  •  
  •  
  •  

काठमाडौं । बझाङमा बलात्कारको घटना पाँच सयमा मिलापत्र गराउने ६ जनालाई प्रहरीले पक्राउ गरेको छ । बझाङको मष्टा गाउँपालिका–२ खिकालामा बलात्कारको घटना गाउँमै मिलापत्र गरेर ढाकछोप गर्ने ६ जनालाई नियन्त्रणमा लिइएको जिल्ला प्रहरी कार्यालय बझाङले जनाएको छ ।

खिकालामा गत साउन २९ गते १३ वर्षीया बालिकालाई घट्ट गएका बेला स्थानीय १८ वर्षीय राजेन्द्र बोहराले बलात्कार गरेका थिए। उक्त घटना गाउँमै मिलापत्र गरेर ढाकछोप गरेको आरोपमा स्थानीय झलक दमाई, लालबहादुर बोहरा, धनचढी बोहरा, धमकला दमाई, पिरु दमाई र गल्फे बोहरालाई प्रहरीले पक्राउ गरेको हो । असोज ७ गते खिकालाकै १२ वर्षीया बालिकाको बलात्कारपछि हत्या घटनामा बोहरा पक्राउपछि उनले यसअघि पनि बलात्कार गरेको खुलेको हो।

जिल्ला प्रहरी कार्यालय बझाङका अनुसार साउन २९ गते बोहराले ती बालिकालाई बलात्कार गरेको र त्यसको पर्सिपल्ट साउन ३१ गते आफन्तहरूसँग बसेर छरछिमेकीहरुले मिलापत्र गरेका थिए। बोहराले गल्ती भएको भन्दै ५०० रुपैयाँ राखेर पीडित बालिकाको खुट्टा ढोग्न लगाई उनीहरुले मिलापत्र गरिएको बताइएको छ।

 


  •  
  •  
  •