एनआरएन लघुवित्तको केन्द्रीय कार्यालय धनगढीमा

409
  •  
  •  
  •  

धनगढी, १० वैशाख(ओएनएस) : एनआरएन लघुवित्त वित्तीय संस्था लिमिटेडको केन्द्रीय कार्यालय धनगढीमा सञ्चालनमा आएको छ ।

गैरआवासीय संघ (एनआरएन)को लगानीमा सुदूरपश्चिम प्रदेशमा पहिलो पटक राष्ट्रियस्तरको नेपाल राष्ट्र बैंकबाट इजाजतपत्र प्राप्त संस्था एनआरएन लघुवित्त वित्तीय संस्था लिमिटेडको केन्द्रीय कार्यालय स्थापना गरिएको हो ।
कार्यालयको एक समारोहकाबीच नेपाल राष्ट्र बैंकका गभर्नर डा. चिरन्जीवी नेपालले उद्घाटन गरेका छन् ।
कार्यक्रममा डा. नेपालले वित्तीय अनुशासन र वित्तीय सुशासन कायम गर्न नसकेसम्म आर्थिक रूपमा मुलुकले समृद्धि हासिल गर्न नसक्नेमा जोड दिए ।

एनआरएन लघुवित्त वित्तीय संस्था लिमिटेडका नायब प्रमुख कार्यकारी अधिकृत एवं कम्पनी सचिव इन्द्रकुमार शाहले संस्था सञ्चालनको दुई महिनामा अपेक्षाअनुरूपको प्रगति हासिल भएको बताए ।

सो अवधिसम्ममा १२ जिल्लामा शाखा विस्तार गरेर २५ शाखा स्थापना गरिएको छ । ४१ वटा स्थानीय तहमा गरी ३ सय ५६ केन्द्र तथा १ हजार ३ सय ५६ समूह गठन गरिसकेको छ । यो अवधिसम्ममा एनआरएनका ४ हजार २ सय ५ सदस्य संख्या पुगेको बताइएको छ । संस्थाको लगानीमा रहिरहेको कर्जा रकम ६ करोड ६ लाख ७५ हजार पुगेको छ ।

अनिवार्य बचततर्फ ४७ लाख रहेको भन्दै कम्पनी सचिव शाहले गरिवी निवारणको प्रमुख औजार भनेकै लघुवित्त भएकाले सुदूरपश्चिम प्रदेशबाट राष्ट्रियस्तरको संस्था सञ्चालनमा ल्याइएको बताए ।

संस्थाका मर्जर समितिका संयोजक शम्भुप्रसाद घिमिरेले नेपालमा वित्तीय संस्था थोरै तर सबै क्षेत्रबाट बलियो हुनुपर्ने भनेर सुदूरपश्चिम प्रदेशबाट संस्था सञ्चालनमा ल्याइएको जानकारी गराए ।

कार्यक्रममा गैरआवासीय नेपाली संघ (एनआरएन) का महासचिव डा. बद्री केसीले सँगसँगै मिलेर अघि बढ्न सकिएमा पैसाका लागि विदेश पलायन हुनु नपर्ने बताए ।

एनआरएन लघु वित्त वित्तीय संस्थाका अध्यक्ष प्रमोद उप्रेतीले वित्तीय सु–शासन कायम गर्दै संस्थालाई बलियो बनाएर राष्ट्रियस्तरमै नमूना संस्थाको रूपमा पहिचान दिलाउन र रोजगारीका अवसर सिर्जना गर्न व्यवस्थापन पक्षलाई अझ बलियो बनाएर लैजाने बताए ।

सो अवसरमा नेपाल राष्ट्र बैंक धनगढीका प्रमुख निश्चल अधिकारी, एनआरएनका सदस्य शिशिर भट्ट, राष्ट्र बैंकका उपप्रमुख मनोज पोखरेल, कैलाली उद्योग वाणिज्य संघका अध्यक्ष पुष्पराज कुँवर, कञ्चन डेभलपमेन्ट बैंक केन्द्रीय कार्यालय कञ्चनपुरका प्रमुख कार्यकारी अधिकृत विरुराम जैसीलगायतको सहभागिता थियो ।


  •  
  •  
  •