नेपालले सूचना प्रविधिमा छोटो समयमा नै फड्को मारेको छ : प्रधानमन्त्री

450
  •  
  •  
  •  

काठमाडौं, १९ वैशाख(ओएनएस) : प्रधानमन्त्री केपी शर्मा ओलीले नेपाली समाजले सूचना प्रविधिमा छोटो समयमा नै फड्को मारेको बताएका छन् ।

राष्ट्रिय सूचना तथा सञ्चार प्रविधि दिवशको बिहीबार उद्घाटन गर्दै प्रधानमन्त्री ओलीले नेपालमा केही वर्ष अघिसम्म पनि मोबाइल चलाउनु अनौठो मानिने भन्दै अहिले यो अत्यावश्यक बस्तु भइसकेको बताए ।

उनले भने, ‘केही वर्ष अघिसम्म हङकङमा ड्राइभरले मोबाइल चलाएको कुरा सुन्दा नेपालीहरु अनौठो मान्थे तर अहिले आफ्नै घरमा बच्चालाई मोबाइलबाट जोगाउन गाह्रो भइसक्यो । मोबाइलसँग जोडिएको प्रविधि हाम्रो अभिन्न अंग भइसक्यो । यो डिजिटल नेपाल तर्फको यात्रा हो ।’

प्रधानमन्त्री ओलीले प्रविधिलाई उत्पादनसँग जोड्नुपर्ने बताए । ‘प्रविधिलाई उत्पादन र विकाससँग जोडेर उपयोग गर्नुपर्दछ’ प्रधानमन्त्री ओलीले भने, ‘प्रविधिले छिटो र उन्नतस्रोतको ज्ञान दिन सक्छ । त्यसको सदुपयोग गर्नु पर्दछ ।’

वर्तमान समयमा प्रविधिलाई नकारात्मक कुराको प्रचार गर्ने माध्यमको रुपमा प्रयोग भइरहेको प्रधानमन्त्री ओलीले बताए ।

‘सामाजिक सञ्जाल र सुचना प्रविधिलाई गलत रुपमा उपयोग गर्नु मुन्तलामा ऐजेरु र धानमा साँवा पलाए जस्तै हो’ प्रधानमन्त्री ओलीले भने, ‘त्यसकारण यस्ता प्रवृतिलाई निस्तेज पार्दै लैजानु पर्दछ ।’

प्रविधिको प्रयोग मार्फत समृद्ध नेपाल, सुखी नेपालीको राष्ट्रिय आकांक्षा पूरा गर्न सहज बन्ने प्रधानमन्त्री ओलीको भनाइ छ । कार्यक्रममा सञ्चार तथा सुचना प्रविधि मन्त्री गोकुल बाँस्कोटाको पनि उपस्थिती थियो ।


  •  
  •  
  •