नेपालद्वारा हङकङ ७ विकेटले पराजित

211
  •  
  •  
  •  

काठमाडौं, २२ वैशाख (ओएनएस) : मलेसियामा जारी एसीसी प्रिमियर लिग क्रिकेटको आफ्नो चौथो खेलमा हङकङविरुद्ध नेपाल सात विकेटले विजयी भएको छ । जीत सँगै अंक तालिकाको दोस्रो स्थानमा उक्लिएको नेपाल एसीसी च्याम्पियनसिपका लागि छनौट भएको छ ।
वर्षाले प्रभावित खेलमा डकवर्थ–लुईस नियमका आधारमा ३८ ओभरमा छोट्याएर नेपाललाई एक सय ४४ रनको लक्ष्य दिइएको थियो । नेपालले उक्त लक्ष्य २३ बल बाँकी छँदा मात्र तीन विकेटको क्षतिमा पूरा गर्यो ।
नेपालका लागि कप्तान पारस खड्काले अटआउट ४३ रन बनाए भने उनलाई १९ रन बनाएर शरद भेष्वाकरले अन्तिमसम्म साथ दिए । त्यस्तै ओपनर नरेश बुढाएरले ४१, ज्ञानेन्द्र मल्लले १५ र सुवास खकुरेलले १६ रन बनाएर आउट भए ।
यसअघि पहिले ब्याटिङ गरेको हङकङले ४१ ओभर ५ बलमा अल आउट हुँदै एक सय ८१ रन बनाएको थियो । हङकङका लागि इरफानले शतकिय पारी खेलेपनि टिमलाई जिताउन सकेनन् ।
बलिङ तर्फ नेपालका सोमपाल कामीले ४ विकेट लिए । बसन्त रेग्मी र आरिफ शेखले दुइ–दुई विकेट लिए । नेपालले आफ्नो अन्तिम खेलमा अफ्गानिस्तान सँग प्रतिस्पर्धा गर्नेछ ।

  •  
  •  
  •