काठमाडौं, ३ असोज (ओएनएस): दीपकराज गिरी र दिपाश्री निरौलाको चलचित्र ‘छक्का पञ्जा २’ को गीत ‘नाइलनको साडी’लाई एक करोड बढीले हेरेका छन् ।
प्रदर्शनमा नआउँदै यसको गीतलाई दर्शकले अत्याधिक रुचाएका छन् । जसको कारण युट्युबमा सार्वजनिक भएको दुई महिना भित्र एक करोड पटक हेरिएको छ ।
सार्वजनिक भएको समयमा विवादमा समेत तानिएको यो गीतलाई अलमोडा राना उप्रेती र सुजता बर्माले गाएका हुन् ।
दीपकराज गिरी र प्रिन्सको शब्द रहेको गीतमा अल्मोडाले नै अरेन्ज गरेका हुन् । गीतमा प्रिन्स नेपाली र स्वर्गीय कान्छा मगर नेपालीको संगीतलाई समेटिएको छ । चलचित्र ‘छक्का पञ्जा २’ यही असोज ११ गतेदेखि देशभर प्रदर्शनमा आउँदैछ ।
