बैंक ठगेको डेढ करोडमा धमिरा

192
  •  
  •  
  •  

बैंक ठगेको डेढ करोडमा धमिरा
काठमाडौं-मेगा बैंक धादिङका ब्रान्च म्यानेजर राजेन्द्र पाण्डे जापान जाने तयारीमा थिए। जानुअघि आफैं कार्यरत बैंकबाट रकम उम्काउने जुक्ति निकाले। भाइसहितका सहयोगीलाई मेगाकै न्युरोड शाखाबाट टुरिजम विकास बैंकको र राष्ट्रिय वाणिज्य बैंकबाट मेगाको २ करोड रुपैयाँ निकाल्न लगाएर उनी जापान उडे।
उनी जापान पुगे, यता भाइसहितको टोलीले योजना फत्ते गर्योग। बैंकिङ कसुरबारे जानकार उनले एक वर्षसम्म त्यो पैसा नचलाउन निर्देशन दिए। बैंकिङ कसुरको अपराधमा बैंकबाहिरका व्यक्ति संलग्न रहे अनुसन्धानको हदम्याद एक वर्ष र भित्रकै व्यक्ति संलग्न देखिए हदम्याद नहुने कानुनी प्रावधान हेर्दै उनले सो घटनामा आफ्नै भाइलाई प्रयोग गरेका थिए।

योजनाअनुसार झुक्याएर निकालेको २ करोड ९ लाख रुपैयाँ प्रदीप पाण्डे र प्रवीण पाण्डेले धादिङ सलाङ– ६ स्थित घरको खोपीमा लगेर लुकाए। खोपीमा राख्दा धमिराले खाएपछि त्यहाँबाट निकालेर बारीमा खाल्डो खनेर लुकाए। अनुसन्धानरत महानगरीय प्रहरी अपराध महाशाखाले घटनाको करिब एक वर्षपछि ठगीको गुत्थी सुल्झाउँदै बिहीबार घटनामा संलग्न प्रदीप र प्रवीणलाई पक्राउ गर्योट। ११ लाख रुपैयाँ घरमै फेला पर्योब, ६७ लाख बैंकमा।

एसएसपी कार्कीका अनुसार राजेन्द्रका भाइले गत दसंैमा ५७ लाखको जग्गा किन्न बैना गरे। बैना गर्न एक लाख दिए। बाँकी पैसाका लागि खोपी खोल्दा धमिराले खाएको देखेपछि तिल्मिलाएका उनले सद्धे १० लाख निकालेर बाँकी पैसा बारीमा लगेर गाडेका थिए।

बाँकी पैसा खै त?

घरअगाडि बारीको पाटोमा लुकाएको वयानका आधारमा प्रहरीले बिहीबार धादिङ पुगेर उनीहरुले देखाएको ठाउँमा खन्दा पोको फेला पर्योप। त्यसभित्र सबै धमिरा र माटोले खाएका नोट भेटिए।
अपराध महाशाखाका प्रमुख एसएसपी पुष्कर कार्कीका अनुसार दाइको निर्देशनअनुसार उनीहरुले पैसा घरको खोपीमा लुकाएका थिए। खोपीमा राख्दा धमिराले खाएपछि त्यहाँबाट निकालेर खाल्डोमा गाडेछन्। ‘खाल्डोमा फेला परेको रकममध्ये १० लाख जत्ति राम्रो छ, अरु सबै धमिरा र माटोले खाएछ,’ एसएसपी कार्कीले भने।

२०७० माघ १२ गते मेगा बैंकमा रहेको टुरिजम विकास बैंकको खाताको ९ लाख ९० हजार रुपैयाँ मेगाको न्युरोड शाखाबाट र त्यसको दोस्रो दिन राष्ट्रिय वाणिज्य बैंक भोटाहिटी शाखाबाट दुई करोड रुपैंया निकालिएको थियो।
एसएसपी कार्कीका अनुसार अनुसन्धानमा सो ठगी प्रकरण मेगा बैंक धादिङका बैंक म्यानेजर राजेन्द्र पाण्डेको योजनामा भएको खुलेको छ। सो प्रकरणमा मेगा बैंक कान्तिपथका ब्रान्च म्यानेजर शम्भु थापा, धादिङका प्रवीण पाण्डे र प्रदीप पाण्डे सहयोगी रहेको खुलेको छ। यीमध्ये राजेन्द्र पक्राउ परेका छैनन्। अन्य तीनजनालाई महाशाखाले पक्राउ गरेको छ।

ठगी श्रृंखला

महाशाखाका अनुसार २०७० मंसिर ९ गते मेगा बैंक कान्तिपथ शाखाबाट टुरिजम बैंककोे १० वटा चेक अनधिकृत रूपमा बाहिरिएको थियो। चेक जारी गर्दा चेक माग्ने फारम, टुरिजमको छाप र खातावालाको दस्तखत नमुनासमेत भए पनि ती सबै फर्जी थिए।
अनुसन्धानमा खातावालको दस्तखत नमुना र चेक निकाल्न पेश गरेको फारम रुजु भएको थिएन। नियमानुसार फारममा दस्तखतसमेत भएको थिएन। घटनाको मुख्य योजनाकार राजेन्द्रका भाइ प्रवीणले अल्फाबिटा कलेजको विद्यार्थीको परिचयपत्र देखाएका थिए। उनले चेक निकाल्न आवेदन फारममा मेगा बैंक विराटनगर शाखामा खाता रहेका रजत तोदीको नाम प्रयोग गरेका थिए। तर, चेक लिँदा भने राकेश सिलवालको नक्कली परिचयपत्र देखाएर हस्ताक्षर गरेका थिए।

एसएसपी कार्कीका अनुसार प्रवीणलाई चेक माग्ने फारम उनका दाजु राजेन्द्रले उपलब्ध गराएका थिए। प्रारम्भिक अनुसन्धान प्रतिवेदनअनुसार चेक माग्न पेस गरेको फारममा शंका लागी बैंकको कस्टमर सर्भिस सेन्टरका कर्मचारीले सोधखोज गर्दा मेगा कान्तिपथका ब्रान्च म्यानेजर शम्भुबहादुर थापाले चेक दिन आदेश दिएका थिए।

प्रहरीका अनुसार उनीहरुले मेगा बैंकको विराटनगर शाखामा खाता खोल्न प्रयोग भएको तोदीको नागरिकताको प्रतिलिपि प्रयोग गरेर टेकुमा रहेको राष्ट्रिय बाणिज्य बैंकको शाखामा खाता खोलेका थिए। प्रहरीका अनुसार सो खाता राजेन्द्र आफैंले खोलेका थिए।
माघ १२ गते राष्ट्रिय बाणिज्य बैंक भोटाहिटी शाखाबाट सन्जय ढकालको नाममा नयाँ खाता खोलियो। यो खाता खोल्दासमेत ढकालले खाता खोल्न बैंकमा पेस गरेको नागरिकताको प्रतिलिपि दुरुपयोग गरेका थिए।

प्रहरीका अनुसार सोही समूहले माघ १२ मा मेगा बैंकको न्युरोड शाखाबाट टुरिजम बैंकका तत्कालीन सिइओ मनोज खड्का र मोहनप्रसाद पाण्डेकोे दस्तखत गरी प्रवीण पाण्डेले सन्जय ढकालको नाममा ९ लाख ९० हजार रुपैयाँ निकालेका थिए। दोस्रो दिन प्रवीणले नै सन्जय ढकालको राष्ट्रिय बाणिज्य बैंक भोटाहिटी शाखाको खाताबाट चेक क्लियरिङको माध्यमबाट २ करोड रुपैयाँ झिकेका थिए।
प्रहरीका अनुसार उनीहरुले विभिन्न मितिमा विभिन्न व्यक्तिको नामबाट सञ्जय ढकालको नाममा काटिएको राष्ट्रिय बाणिज्य बैंकको चेकबाट १ करोड ४१ लाख ९० हजार निकालेका थिए। राष्ट्रिय बाणिज्य बैंक महाराजगन्ज शाखाबाट १९ र २० गते ३० लाख र ३१ लाख गरी ६१ लाख निकालेका थिए।
उनीहरुले निकालेको रकममध्ये ६१ लाख तोदीको खातामा जम्मा भएको थियो। उनीहरुले सो रकम निकाल्न सकेनन्, कसैले दाबी गर्न पनि आएनन्। प्रहरीले सो रकम बरामद गरेको छ। अनधिकृत रूपमा ढकालको खातामा उनीहरुले जम्मा गरेको ७ लाख रुपैयाँसमेत ठगीकै रहेको प्रहरीको दाबी छ।

एसएसपी कार्कीका अनुसार प्रारम्भिक अनुसन्धानमै राष्ट्रिय वाणिज्य बैंक टेकु शाखाको सिसिटिभी फुटेजमा राजेन्द्र देखिएका थिए। सोही तथ्यको आधारमा प्रहरी पाण्डेतिर तानिएको थियो। एसएसपी कार्कीका अनुसार प्रारम्भमा टेकुको फुटेज देखाउँदा शम्भुले चिनेको छैन भने। पछि उनका भाइ पक्राउ पर्दा भने उनले इन्कार गर्न सकेनन्। कार्कीका अनुसार अहिलेसम्मको अनुसन्धानमा शम्भुले पैसा लिएको देखिएको छैन। राजेन्द्रले एक वर्षसम्म पैसा ननिकाल्नू भनेकाले उनले पैसा नपाएको प्रहरीको निष्कर्ष छ।

केपी ढुङ्गाना /नागरिकबाट


  •  
  •  
  •