मेडिकल कलेजको शुल्क विवादबारे छानबिन शुरु

 कुनै गुनासो वा उजुरी भए १५ दिन भित्र पठाउन सकिने
345
  •  
  •  
  •  

काठमाडौं, २८ चैत(ओएनएस) : स्वास्थ्य समितिअन्तर्गत गठित उपसमितिले मेडिकल कलेजको शुल्कको विवादबारे छानबिन शुरु गरेको छ । सुरेशकुमार राईको संयोजकत्वमा गठित उपसमितिले संसदीय उपसमितिमा छानबिन थालेको हो ।

उपसमितिले बिहीबार सम्बन्धित मेडिकल कलेजमा अध्ययनरत विद्यार्थी, अभिभावक, जनप्रतिनिधिहरु र अन्य सरोकारवालाहरुलाई कलेजले मर्का पर्ने गरी कुनै क्रियालकलाप गरेको भए पत्राचार गर्न आग्रह गरेको छ ।

उपसमितिले सार्वजनिक सूचना निकालेर मेडिकल कलेजले लिइरहेको शुल्कलगायतका विषयमा कुनै गुनासो वा उजुरी भए १५ दिन भित्र पठाउन भनेको छ ।

मेडिकल कलेजहरुले बढी शुल्क लिएको भए विद्यार्थी, अभिभावक, जनप्रतिनिधि वा अन्य सरोकारवालाहरुले उपसमितिसमक्ष उजुरी दिन सक्नेछन् ।

उपसमितिले छानबिनका लागि शिक्षा मन्त्रालय, त्रिभुवन विश्वविद्यालय र काठमाडौं विश्वविद्यालय र सम्बन्धन पाएका मेडिकल कलेजबाट विवरण र आवश्यक कागजातसमेत मगाइएको समिति सचिवालयले जनाएको छ ।

सरकारले एमबीबीएस अध्यययन गर्न उपत्यकाभित्र ३८ लाख ५० हजार र उपत्यका बाहिर ४२ लाख ४५ हजार शुल्क तोकेको छ । बीडीएसतर्फ भने १९ लाख ३२ हजार ६ सय १२ रुपैयाँ शुल्क तोकिएको छ । तर, गण्डकीलगायत निजी मेडिकल कलेजहरूले विद्यार्थीसँग ६० लाखसम्म शुल्क लिएको सार्वजनिक भएपछि विवाद सुरु भएको थियो ।

यही चैत १० गते बसेको शिक्षा समितिको बैठकले समिति सदस्य सुरेशकुमार राईको संयोजकत्वमा ९ सदस्यीय उपसमिति गठन गरेको थियो ।

उपसमितिको सदस्यमा सांसदहरू खगराज अधिकारी, योगेश भट्टराई, चित्रलेखा यादव, उमेश श्रेष्ठ, जीवनराम श्रेष्ठ, मनकुमारी जीसी, एकवाल मियाँ र सन्तबहादुर थारू छन् ।


  •  
  •  
  •