मनोजले ल्याए एकसाथ तीन एल्बम

60
  •  
  •  
  •  

काठमाडौं, २० मंसिर (ओएनएस) : गायक तथा संगीतकार मनोज साङसोनले एकसाथ तीनवटा एल्बम ल्याएका छन् । राजधानीमा शुक्रबार आयोजित कार्यक्रममा प्रमुख अथिति पूर्वअर्थमन्त्री एवं गीतकार एस्पी कोइरालाले गायक तथा संगीतकार साङसोनका ‘नोस्टालजिया’, ‘माया नमार्नू है’ र ‘अनमोल’को लोकार्पण गरे ।

‘नोस्टालजिया’मा संगीत तथा शब्द गायक साङसोनकै छ भने ‘माया नमार्नू है’मा लीला राईको एकल स्वर र साङसोनको एकल संगीत छ । यस एल्बममा सचित राई, पदम राई, चन्द्रप्रभात राई, राजन साम्पाङ, निराजन बतास र तिलक वालाहाङ राईको शब्द समेटिएको छ ।

चन्द्रप्रभात राईको एकल शब्द तथा आफ्नो संगीतमा उनले ‘अनमोल’ एल्बम प्रकाशनमा ल्याएका हुन् । यस एल्बमका गीतहरूमा राजेशपायल राई, अन्जु पन्त, विजय राई, मतिराम राई, सुविका राईलगायतको स्वर सुन्न सकिन्छ । यी एल्बम साङसोनका ११औँ, १२औँ र १३औँ एल्बम हुन् ।

नेपाली वाङमय परिषद्द्वारा आयोजित कार्यक्रममा प्रमुख अतिथि कोइरालाले मनोजको संगीत अब्बल रहेको बताए । उनले संगीत–कर्मलाई निरन्तरता दिन सुझाव दिँदै ‘नोस्टाल्जिया’का गीत सुन्दा मनोजलाई आफूले ‘नदीजस्तो बगेको’ पाएको बताए । कार्यक्रममा संगीतकार शान्तिराम राई, समालोचक महेश पौड्याल, पत्रकार पदम वालाहाङ राई, गीतकार श्याम तमोट, प्राज्ञहरू उदय श्रेष्ठ र माधव प्रधानले मनोजको सांगीतिक कार्यको प्रशंसा गर्दै उनले यस क्षेत्रमा नेपाली मौलिकता दिन खोजेको उल्लेख गरेका थिए ।


  •  
  •  
  •