कसरी बने यी ७ वर्षे बालक एक दिनका लागि रियल पुलिस इन्स्पेक्टर

419
  •  
  •  
  •  

एजेन्सीहरुको सहयोगमा १७ चैत्र : ७ वर्षे बालक एक दिनका लागि कसरी बने रियल पुलिस इन्स्पेक्टर सुन्दा हामीलार्इ पनि अचम्म लाग्न सक्छ।
तर याे अचम्म हाेइन न की कुनै फिल्मी कथाकाे कुराे हाे । सपना नहुने सायद कोही मानिस भेटिएलान्। र, आफ्ना सपना पूरा भइदियोस् भन्ने कामना पनि सबैको मनमा हुन्छ। तर, सजाएका सबै सपना सबैको जीवनमा पूरा हुन्छन् भन्ने छैन। अर्कातर्फ जब हाम्रो सपनाले मूर्त रुप लिएको साक्षी बस्न पाइन्छ तब त्यो बेलाको खुशी वर्णन गरी साध्य हुँदैन।

यस्तै, खुशीको अनुभूत गर्न पाएका छन् मुम्बईका ७ वर्षीय अर्पित मन्डलले, जब उनी एक दिनका लागि महाराष्ट्र प्रहरीको इन्स्पेक्टर बने। मस्तिष्क क्यान्सरबाट पीडित अर्पितको इन्स्पेक्टर बन्ने चाहनालाई पूरा गरिदिएपछि यतिबेला महाराष्ट्र प्रहरीले गरेको कार्यको चर्चा चुलिएको छ। त्योभन्दा बढी पछिल्लो ५ महिनादेखि मस्तिष्क क्यान्सरसँग जुझिरहेका अर्पितलाई खुशी र रोगसँग लड्ने सकारात्मक शक्ति एकैसाथ मिलेको छ।

उनी आफूलाई क्यान्सर रोग लागेको छ भन्नेमा जानकार छन्, तर उनी अहिल्यै हार मान्ने अवस्थामा छैनन्। गत अक्टोबरमा अर्पितलाई क्यान्सर लागेको बारे उनका परिवारलाई जानकारी मिल्यो, तब उनीहरु छाँगाबाट खसेजस्तै भए। तर, पछिल्लो समय भने छोराको मुहारमा फर्केको खुशी र सकारात्मक सोचले उनीहरुलाई केही सान्त्वना दिएको छ।

अर्पितमा यो सोचको विकास हुनु र उनको सपना पूरा हुनुमा ‘मेक अ विस इन्डिया फाउन्डेसन’को महत्वपूर्ण भूमिका छ। जसले दीर्घ रोग लागेका व्यक्तिहरुको सपना पूरा गर्नमा सहयोग गर्ने काम गर्छ। जब फाउन्डेसनलाई अर्पितको रोगबारे जानकारी मिल्यो तब उनीहरु अर्पित र उनको परिवारसँग सम्पर्कमा आए। अर्पितसँगको भलाकुसारीपछि उनी मुम्बईको प्रहरी निरीक्षक (इन्स्पेक्टर) बन्न चाहन्छन् भन्ने फाउन्डेसनका अधिकारीहरुलाई जानकारी मिल्यो। त्यसपछि अर्पितको सपनाबारे कुरा गर्न उनीहरु मुम्बई प्रहरीकहाँ पुगे।

मुम्बई प्रहरीले फाउन्डेसनले लिएर आएको अर्पितको प्रहरी निरीक्षक बन्ने प्रस्तावलाई पूरा गर्ने प्रतिबद्धता जनायो। मुम्बई प्रहरीले उनलाई मुलुन्ड प्रहरी चौकीमा एक दिनका लागि प्रहरी निरीक्षकको पूर्ण जिम्मवारी सुम्पियो। त्यो एकदिनको कार्यभार सुन्दा नाटकीय लागे पनि उनलाई प्रहरीमा सामेल हुँदा ख्वाइने सपथ खुवाएर मात्रै कार्यकक्षमा प्रवेश गराइएको थियो।

सपथपछि उनी आफ्नो कुर्सीमा बसे। दैनिक कारबाही रजिस्टर हेरे र अन्य प्रहरी अधिकारीसँग कामकारबाहीबारे कुरा गर्न थाले। उमेर, अनुभव र दक्षता सबै कुरामा अर्पितसँग तुलना गर्न नमिल्ने भए पनि अन्य प्रहरी अधिकारीले उनलाई पदअनुसारको सम्मान दिएका थिए। एक दिनका लागि प्रहरी निरीक्षक बनेका अर्पितलाई अन्य प्रहरीले दर्जाअनुसारको सलाम समेत ठोकेका थिए।


मुम्बई प्रहरीले यो जानकारी गत मार्च २२ मा आफ्नो ट्विटर ह्यान्डलमा अर्पितका केही तस्बिरसहितको स्टाटस राखेर गराएको थियो। मुम्बई प्रहरीको सो कार्यले यतिबेला सामाजिक सञ्जालभरि चर्चा पाइरहेको छ।

‘जुन बालक क्यान्सरदेखि समेत डराएको छैन। त्यस्तो बालकलाई प्रहरी चौकीको इन्चार्ज बन्ने हक छ,’ मुम्बई प्रहरीले आफ्नो ट्विटरमा लेखेको छ, ‘मुम्बई प्रहरीले यदि आफ्नो बस चल्ने भए अर्पितको प्रहरी निरीक्षक बन्ने सपनाजस्तै उनका बाँकी सपना पूरा गर्ने थियौँ।’

मुम्बई प्रहरीको यो कार्यसँगै सामान्यतया कठोर मानिने प्रहरीभित्र पनि कोमल दिल हुन्छ भन्ने कुरा प्रमाणित गरेको कतिपयले टिप्पणी गरेका छन्।

अर्पितको सपना पूरा गर्न मुम्बई प्रहरीले ‘मेक अ विस इन्डिया फाउन्डेसन’सँग मिलेर उठाएको कदम गम्भीर रोगसँग लडिरहेका व्यक्तिहरुको सपना पूरा गर्न तथा जीवन जिउने उर्जा थप्नका लागि एक सकारात्मक पहलका रुपमा हेरिएको छ।

अर्पितलाई लागेको मस्तिष्क क्यान्सरको पीडा भने सकिएको छैन, तर आफ्नो सपनाले मूर्त रुप लिएको खुशीले उनलाई जीवनमा अगाडि बढ्न अवश्य बल मिलेको छ। नेपाल लाइफबाट


  •  
  •  
  •