फूलको मालालाई प्रोत्साहन गर्दै तुलसीपुर उपमहानगरपालिका

84
  •  
  •  
  •  

काठमाडौं । पछिल्लो समय सयपत्री, मखमली, गोदावरी लगायतका फूलहरु लोपहुँदै जान थालेका छन् ।
यस्ता फूलहरु लोपहुन थालेपछि विभिन्न चाडपर्व एव कार्यक्रमहरुमा प्लास्टिकको फूलका साथै खादाहरुको प्रयोग बढ्न थालेको छ ।

यसरी प्राकृतिक रुपमा फूल्ने फूलको अभाव हुन थालेपछि दाङको तुलसीपुर उपमहानगरपालिकाले खादाको सट्टा स्थानीय स्तरमा पाइने फुलको माला र ढाकाको उत्पादनलाई प्रयोगमा ल्याउने नीति अघि सारेको छ ।

उपमहानगरपालिकाले आर्थिक वर्ष २०७६/७७ को कार्यक्रममा नै फूलको मालालाई प्रोत्साहन गर्ने कार्यक्रम समेटेको छ ।
उपमहानगरपालिका प्रमुख घनश्याम पाण्डेले भने ‘हामीले प्लाष्टिकजन्य सामग्री निषेध गरी दुनाटपरीलाई प्राथमिकता दिने नीति समेत अघि सारेका छौं ।’

यस्तै उपमहानगरपालिकाले आगामी आर्थिक वर्षमा फोहरमैला प्रशोधन केन्द्र स्थापना गर्ने भएको छ । फोहर विर्सजन गर्ने स्थायी स्थान नहुँदा बजारको फोहरलाई तुलसीपुरको महेन्द्र मावि नजिकै रहेको खोलामा थुपार्ने गरिएकामा अब उपमहानगरपालिकाले फोहरमैला प्रशोधन केन्द्र स्थापना गर्ने नीति अघि सारेको हो ।

उपमहानगरपालिकाले सामुदायिक र निजी बनलाई दिगो व्यवस्थापन गर्ने, सार्वजनिक स्थानमा शौचालय निर्माण गर्ने, बाढीको जोखिममा रहेका यस क्षेत्रका नदी तथा खोलाहरुमा पूर्व सूचना दिने प्रणाली जडान प्रदेश सरकारसँग समन्वय गर्ने नीति अघि सारेको छ ।

यस्तै उपमहानगरपालिकाले युवाहरुलाई उद्यममा जोड्ने, द्वन्द्वपीडिको आयआर्जन वृद्धि गर्ने, तुलसीपुरमा उद्योग ग्राम, उद्योग क्षेत्र र आर्थिक क्षेत्रमा विकास गर्ने, स्थानीय उत्पादनलाई बजारीकरण गरिने कुरालाई पनि उपमहानगरपालिकाले नीति तथा कार्यक्रममा समावेश गरेको छ ।
श्रमिकलाई परिचयपत्र उपलब्ध गराउने, कृषकलाई पोषाक उपलब्ध गराउने नीति उपमहानगरपालिकाले अघि सारेको प्रमुख पाण्डेले बताए । तुलसीपुर उपमहानगरपालिकाले नगर सहकारी प्रशिक्षण स्थापना गर्ने नीति समेत अघि सारेको छ ।

सहकारीमार्फत गरीबी न्यूनीकरण, उद्यमशीलताको विकास गरिने, सहकारीमार्फत विभिन्न क्षेत्रमा लगानी गर्ने नीति पनि अघि सारेको छ ।

सहकारीको सेवालाई चुस्त, दुरुस्त बनाउन डिजिटल सहकारीको अवधारणा अघि बढाउने, सहकारीको दर्ता, गाभ्ने, खारेजी तथा अनुदान वितरणसम्बन्धी मापदण्ड निर्माण गरिने, बचत गर्ने बानीको विकास गराउने, सुपथ मूल्यको पसल खोल्ने, बिउ वितरण गर्ने, सिँचाइको सुविधा, कृषि उत्पादन र बजार व्यवस्थापन, ग्रेडिङ, प्याकेजिङ, कोल्डस्टोरलगायतका काम सहकारीमार्फत गर्ने नीति अघि सारिएको प्रमुख पाण्डेले
जानकारी दिए ।


  •  
  •  
  •