काठमाडौं । नयाँ जनप्रतिनिधिका लागि गत वैशाख ३० गते भएको स्थानीय तह निर्वाचनअन्तर्गत करिब २० प्रतिशत स्थानीय तहका मत परिणाम आउन बाँकी रहेका बेला निर्वाचित जनप्रतिनिधिको कार्यकाल शुक्रबारदेखि सुरु भएको छ ।
देशभरका ७५३ पालिकाका ३५ हजार २२१ पदका लागि भएको निर्वाचनमा तुलनात्मकरूपमा बढी मतदाता रहेका महानगरपालिका र उपमहानगरपालिकाको मतगणना सकिन अझै केही दिन लाग्ने देखिएको छ ।
यसैबीच यस वर्षको निर्वाचनमा थुप्रै आफन्तले आफन्तलाई हराएर निर्वाचन जितेका छन् ।
पारिवारिक नाताले आफन्त भएपनि चुनावी मैदानमा उनीहरू प्रतिस्पर्धीको रूपमा उभिएका थिए । एकले अर्कालाई हराउन लागि परे ।
ज्वाइँ जेठानबीच चुनावी भिडन्त
भक्तपुरमा यस पटकको निर्वाचनमा ज्वाइँ जेठानकाबीच चुनावी भिडन्त भयो । मध्यपुर थिमी नगरपालिकाका मदनसुन्दर श्रेष्ठ र सुरेन्द्र श्रेष्ठबीच भिडन्त भएको हो । मदनसुन्दर ज्वाइँ, सुरेन्द्र जेठान हुन् । कांग्रेसबाट मेयरको उम्मेदवार बनेका सुरेन्द्रले एमालेका मदनसुन्दरलाई ४ हजार ६३ मतान्तरले पराजित गरेका छन् ।
सुरेन्द्रले १५ हजार ९८ मत ल्याएर विजयी भएका हुन् भने मदनसुन्दरले ११ हजार ३५ मत ल्याएका छन् । सुरेन्द्र मदनसुन्दरका माइलो जेठान हुन् ।
सुरेन्द्रकी बहिनी सुजाता श्रेष्ठ मदनसुन्दरकी श्रीमती हुन् । जितपछि आफ्ना जेठान सुरेन्द्र सहितको टिमलाई मदनसुन्दरले बधाई तथा शुभकामना दिएका छन् । जहाँ ज्वाइँले जेठानलाई ४ मतले हराए ।
बाजुरामा पनि ज्वाइँ–जेठानबीच रोचक प्रतिस्पर्धा
बाजुराको बडिमालिका–२ को वडाअध्यक्षमा पनि ज्वाइँ–जेठानबीच रोचक प्रतिस्पर्धा भयो । ज्वाइँ डम्बर महतले जेठान गोपाल कार्कीलाई ४ मतले पराजित गरे । डम्बरको ३१९ मत आउँदा गोपालले ३१५ मत प्राप्त गरेका छन् ।
महत नेकपा एमाले र कार्की नेपाली कांग्रेसबाट चुनावी प्रतिस्पर्धा उत्रिएका थिए । अघिल्लो निर्वाचनमा पनि उनीहरू बीच नै प्रतिस्पर्धा भएको थियो । त्यसबेला पनि कार्की ६ मतले पराजित भएका थिए । डम्बरले २ सय ४२ मत ल्याएका थिए भने गोपालले २ सय ३६ मत ल्याएका थिए ।
दाजुभाइ प्रतिस्पर्धी
इलामको रोङ गाउँपालिका–१ को वडाध्यक्षमा दाइले आफ्नै भाइलाई हराएर निर्वाचित भए । कांग्रेसका उम्मेदवार मनोहरी खड्का (दाइ)ले एमालेबाट उम्मेदवार बनेका मनकुमार खड्का (भाइ)लाई पराजित गरेका हुन् ।
मनोहरीले ६ सय १० मत ल्याएर विजयी भएका हुन् भने मनकुमारले ४ सय ८८ मात्रै मत पाएका छन् । त्यस्तै, बाँकेको कोहलपुर नगरपालिका–३ मा पनि दाजुभाइबीच चुनावी प्रतिस्पर्धा भयो । भाइ माधव रिजाल र दाजु तारा केशर रिजालबीचको प्रतिस्पर्धामा माधव निर्वाचित भएका छन् ।
नेकपा एमाले उम्मेदवार माधवले माओवादीका उम्मेदवार ताराकेशरलाई ३ सय मतान्तरले पराजित गरे । माधवले १ हजार ३०७ मत प्राप्त गर्दा ताराकेशरले १ हजार ६०७ मत प्राप्त गरे ।
दाइलाई हराउँदै भाइले जिते
नेपालगञ्ज उपमहानगरपालिका–१ को वडाध्यक्षमा पनि दाइलाई हराउँदै भाइले जित हात पारे ।
एमालेबाट उम्मेदवारी दिएका प्रमोद रिजालले ७ सय ८१ मत प्राप्त गर्दै वडाध्यक्षमा निर्वाचित भए । उनका दाइ कांग्रेसका उम्मेदवार विनोद रिजालले ५ सय ८१ मत प्राप्त गरेर पराजित भएका छन् ।
एकै परिवारका तीनजना प्रतिस्पर्धी
नुवाकोट विदुर नगरपालिका–८ मा एकै परिवारका तीन सदस्यबीच प्रतिस्पर्धा भयो । एकै परिवारका दाजु, भाइ र बहिनीले फरक–फरक पार्टीबाट प्रतिनिधित्व गरे । दाइ सम्वरबहादुर रिमालले नेकपा एमालेका तर्फबाट र भाइ इश्वरबहादुर रिमालले राप्रपाबाट खुला सदस्यमा उम्मेदवारी दिएका थिए । बहिनी देवकुमारी खड्काले गठबन्धनका तर्फबाट नेपाली काँग्रेसबाट महिला सदस्यमा उम्मेदवारी दिएकी थिइन् ।
बाबुसँग पराजित, छोरालाई हराए
पाँचथरको फिदिम–१ को वडाध्यक्षमा २०५४ र २०७४ सालमा बाबुसँग पराजित एमालेका गजाधर भट्टराईले यसपटक छोरालाई हराएका छन् ।
यसअघि हर्कबहादुर मोक्तानसँग पराजित भएका उनले यसपटक हर्कबहादुरका छोरा सन्तोषलाई पराजित गरेका हुन् । गजाधरले कांग्रेसका सन्तोषलाई २ सय ४८ मतान्तरले हराएका हुन् । भट्टराईले १ हजार ७१ मत पाउँदा मोक्तानलाई ७ सय २३ मत प्राप्त भएको थियो ।
वडाध्यक्ष मोक्तानको निधन भएपछि २०७६ मंसिरमा सम्पन्न उपनिर्वाचनमा कांग्रेसका सुवराज थापालाई हराउँदै भट्टराई वडाध्यक्ष बनेका थिए । उनले एमालेबाट वडाध्यक्ष पदका लागि चौथो पटक टिकट पाएका हुन् । भट्टराईले प्रतिस्पर्धी दलका भावनालाई समेट्दै अगाडि बढ्ने प्रतिबद्धता जनाए ।
काका भतिजको भिडन्त
ललितपुर महानगरपालिकाको वडा नं १० मा लगातार १० पटकसम्म वडाध्यक्ष चुनिएका नरसिंह व्यञ्जनकार ११औँ पटकमा पराजित भएका छन्।
नरसिंह व्यञ्जनकार यसअघिसम्म लगातार १०औँ पटकसम्म वडाध्यक्षमा दोहोरिँदै आएका थिए । तर, यसपटकको चुनावमा भने उनी पराजित भए । उनलाई नेपाली कांग्रेसका रविनमान व्यञ्जनकारले हराएका हुन् । रविनमानले ८२५ मत ल्याउँदा उनले ५४३ मत ल्याए ।
नरसिंहले २०२९ सालमा पहिलोपटक वडाध्यक्षमा आफ्नै भाइ (माइलाबाका छोरा) कर्मलाल व्यञ्जनकारलाई पराजित गरेका थिए । ८१ वर्षीय नरसिंह व्यञ्जनकारलाई यसपटक हराउने कांग्रेसका रविनमान नाताले उनकै भतिज हुन्।
काकालाई हराएर भतिज वडा अध्यक्ष
