चालक बन्न अब १० कक्षा पास

काठमाडौं २६ मंसिर ।
सार्वजनिक यातायातको चालक बन्न अब १० कक्षा पास र कम्तीमा २५ वर्ष पुगेको हुनुपर्ने भएको छ । देशमा दुर्घटना बढ्दै गएपछि सरकारले सार्वजनिक यातायातको चालकसम्बन्धी छुट्टै नियमावली ल्याएको हो । मन्त्रिपरिषदको बिहीबार बसेको बैठकले सार्वजनिक सवारीचालकसम्बन्धी नियमावली ०७१ पारित गरेको छ ।

नियमावलीमा सार्वजनिक यातायातका चालक हुन अनिवार्य १० पास गरेको हुनुपर्ने उल्लेख गरिएको छ । ६० वर्ष उमेर नाघेका व्यक्तिले सार्वजनिक यातायात चलाउन नपाउने व्यवस्था रहेको छ ।

नियमावली राजपत्रमा प्रकाशित भएपछि लागू हुनेछ । सार्वजनिक यातायातको चालक हुन सडकपरीक्षा पनि दिनुपर्ने प्रावधान छ । सडकमा कम्तीमा तीन किलोमिटर ट्रायलका रुपमा चलाउनुपर्ने प्रावधान नियमावलीमा छ ।
सार्वजनिक यातायात अन्तर्गत यात्रु बोक्ने बस, माइक्रो, ट्याक्सीलगायत कालो नम्बर प्लेटका सवारीसाधन पर्छन । अन्य चालकहरुका लागि भने पुरानै प्रावधानअनुसार लाइसेन्स दिइन्छ ।
पत्रिकाबाट