संसदीय समितिको भागबण्डा मिल्यो

125
  •  
  •  
  •  

काठमाडौं २ भदौ ।
लीय भागवन्डा मिलेपछि झण्डै सात महिनादेखि रिक्त संसदीय समितिले नेतृत्व पाउने भएका छन् । प्रमुख दलहरुबीचको किचलोका कारण रोकिएको सभापति चयन प्रक्रिया सोमबारबाट प्रारम्भ हुने भएको छ ।

नेताहरुका अनुसार विषयगत ११ र विशेष ३ गरी १४ समिति मध्ये काग्रेस/एमालेले ४/४, एमाओवादी २, राप्रपा नेपाल, मधेसी दल र साना दललाई १/१ समितिको नेतृत्व दिने सहमति भएको छ । सुरक्षा विशेष समितिको नेतृत्व भने सभामुखले नै गर्ने व्यवस्था छ ।

कांग्रेसका प्रमुख सचेतक चीनकाजी श्रेष्ठका अनुसार काग्रेसको भागमा राज्यव्यव्स्था, कृषि तथा जलस्रोत, उद्योग वाणिज्य तथा उपभोक्ता हित र संसदीय सुनुवाई समिति परेको छ । त्यसै एमालेको भागमा विकास, अर्थ, महिला बालबालिका, जेष्ठ नागरिक तथा समाजकल्याण र सुशासन तथा अनुगमन समिति परेको छ । लेखा र अन्तर्राष्ट्रिय तथा श्रम समिति एमाओवादी, सामाजिक न्याय तथा मानवअधिकार राप्रपा नेपाल, वातावरण संरक्षण समिति मधेसी दल र विधायन समिति साना दलमध्येलाई दिने सहमति भएको छ ।

संसदले आउदो बुधवार सभापति चयन गर्ने गरी सोमबार कार्यालालिका सार्वजनिक गर्ने तयारी गरेको छ । लेखा समितिको सभापतिमा भने दुई साताअघि नै एमाओवादी नेता जनार्दन शर्मा चुनिएका छन् । नेतृत्व नहुदा ‘मिनि संसद’को रुपमा चनिने समितिहरु प्रभावकारी बन्न सकेका थिएनन् । दलहरुले समितिको नेतृत्व चयनमा चासो नदिएपछि सभामुख सुवास नेम्बाङले आफ्नो अधिकार प्रयोग गर्दै लेखा समितिको निर्वाचनको मिति घोषणा गरिदिएका थिए । त्यसपछि पनि अन्य समितिको नेतृत्व चयनका लागि दलहरुले तदारुकता नदेखाएपछि सबैको निर्वाचन तालिका तय गरिएको हो ।

प्रमुख दल काग्रेस र एमालेबीच आफूले सम्हालेको मन्त्रालयको कार्यक्षेत्र नपर्ने गरी समितिको जिम्मेवारी लिने सैद्धान्तिक सहमति भएको छ । नियन्त्रण र सन्तुलनको सिद्धान्तअनुसार दलहरुले यस्तो सहमति गरेका हुन् । त्यही सिद्धान्तअनुसार लेखा समितिको जिम्मेवारी विपक्षीलाई दिने परम्परा रहँदै आएको छ । अन्य समितिहरुमा पनि जुन मन्त्रालय आफ्नो भागमा परेको छ त्यो मन्त्रालयको कार्यक्षेत्र पर्ने समितिको जिम्मेवारी अर्को पार्टीलाई दिने सहमति बनेको हो ।

दलहरुबीच समितिहरुको बाँडफाँडमा सहमति जुटेपनि समितिको सभापति को हुने भन्नेबारे पार्टीभित्र टु्गो भने लागेको छैन । ‘सभापति छान्नका लागि निर्वाचनको प्रक्रियामा प्रवेश गरेपनि सर्वसम्मत रुपमा चयन हुन्छ,’ काग्रेस प्रमुख सचेतक श्रेष्ठले भने ।

एमालेभित्र पनि सभापति कसलाई बनाउने भन्ने टुंगो लागेको छैन । ‘सभापति बन्ने विषय पार्टीमा टुंगो लागेको छैन,’ एमाले सचिव गोकर्ण विष्टले भने, ‘सभापति चयनको प्रक्रिया सुरु भएपछि पदाधिकारीको बैठकले नाम टुंगो लगाउँछ ।

कुन समिति कसको भागमा ?

कांग्रेस

राज्य व्यवस्था

कृषि तथा जलस्रोत

उद्योग बाणिज्य तथा उपभोक्ता हित सम्वन्ध

संसदीय सुनुवाई

एमाले

विकास समिति

अर्थ

महिला बालबालिका, जेष्ठ नागरिक र समाज कल्याण

सुशासन तथा अनुगमन

एमाओवादी

लेखा

अन्र्तराष्ट्रिय तथा श्रम

राप्रपा नेपाल

सामाजिक न्याय तथा मानवअधिकार

मधेशी दल

वातवरण संरक्षण समिति

साना दल

विधायन समिति

कान्तिपुरबाट


  •  
  •  
  •