काठमाडौं । नेपालमा पुनः कोरोना संक्रमणको जोखिम बढ्न थालेको छ । स्वास्थ्य तथा जनसंख्या मन्त्रालयले भारतमा कोरोना संक्रमणका दर बढ्दै जाँदा नेपालमा पनि त्यसको जोखिम बढ्न सक्ने भन्दै सभा, जुलुस र भेला नगर्न आग्रह गरेको छ ।
मन्त्रालयले संक्रमणबाट जोगिन साबुन पानीले हात धुने र सेनिटाइजर लगायत जनस्वास्थ्यको मापदण्ड पालना गर्न सर्वसाधारणलाई आग्रह समेत गरेको छ । मन्त्रालयको अनुसार सोमबार ४ हजार ४७२ नमुना परीक्षण गर्दा १५० जनामा कोभिड–१९ को संक्रमण भेटिएको छ ।
अब के गर्ने ? यस्ता छन् जनस्वास्थ्यविद् डा. रवीन्द्र पाण्डेको सुझाव
भारतमा देखिएको कोरोना महामारीको दोस्रो लहरबाट नेपाल जोखिममा छ । अहिलेसम्म नेपालमा फैलिएको छैन ।
भारतमा फैलिएको दोस्रो लहरमा प्रमुख बेलायतको प्रजाति हो । यो प्रजातिको कोरोना भाइरस छिटो फैलिन्छ तर यसको मृत्युदर एकदम कम छ ।
सरकारले भारतमा रहेका नेपालीलाई छिटो स्वदेश आउन प्रेरित गर्नुपर्छ । जसले गर्दा उनीहरु संक्रमित नहुँदै आउन पाउछन् ।
सिमानाकामा नेपाल प्रवेश गर्नेलाई र्यापिड एन्टिजेन टेस्ट गर्ने । पोजिटिभलाई आइसोलेसन केन्द्रमा राख्ने । लक्षण देखिएका तर टेस्टमा नेगेटिभ देखिएकालाई सुविधासम्पन्न क्वारेन्टिनमा राख्ने । लक्षण नदेखिएका अनि नेगेटिभ रिपोर्ट आएका व्यक्तिलाई १० दिन होम क्वारेन्टिनमा बस्ने गरि पठाउने ।
आरडिटि टेस्ट ( एन्टिबोडी टेस्ट ) गर्ने गत सालको गल्ती नदोहोर्याउने | गतसाल संक्रमणको बेला आरडिटि टेस्ट जबर्जस्ती गर्दा महामारी झनै बढेको थियो ।
मेचीदेखि महाकालीसम्म भारतसंग जोडिएका क्षेत्रमा प्रहरी र स्थानीयवासीको संयुक्त गस्ती गर्ने | अबैध प्रवेश रोक्ने।
भारतबाट नेपाल आउने तथा अन्य देशबाट नेपाल आउने हरेक व्यक्तिलाई परीक्षण गरेर मात्र तदनुसार ब्यबस्था गर्ने।
स्थानीय निकाय, स्वास्थ्य संस्था, सामाजिक संस्था परिचालन गरेर मास्कलाई सहि तरिकाले लगाउन अनिबार्य गर्ने। भौतिक दुरी र हातको सफाइमा ब्यापक प्रचार गर्ने।
जनस्वास्थ्यका मापदण्ड पालना गराउन सरकारले अभियान संचालन गर्ने ।
प्रत्येक नागरिकले आफु, आफ्नो परिवार र समाजलाई बचाउन प्रण गर्ने । त्यो मास्क, दुरी र सफाइबाट सम्भव छ ।
नारा, जुलुस, आमसभा, हलभित्रका ठूला बैठक नगर्ने / नगराउने ।
डर नमानौं तर लापरबाही पटक्कै नगरौं । मास्क नै सबैभन्दा सुरक्षित खोप हो ।
