फिल्म ‘छपाक’ विरुद्ध मुद्दा दर्ता

81
  •  
  •  
  •  

एजेन्सी । अभिनेत्री दीपिका पादुकोणको बहुप्रतिक्षीत फिल्म ‘छपाक’ विरुद्ध मुद्दा दर्ता भएको छ । लेखक राकेश भारतीले ‘छपाक’ लाई लिएर बम्बे हाई कोर्टमा मुद्दा दर्ता गरेका छन् । उनले यो फिल्मको कहानी आफूले लेखेको दाबी गरेका छन् । सबैभन्दा अगाडि यो फिल्मको स्क्रिप्टको बारेमा आफूले सोचेको र जसको नाम ‘काला दिन’ राखिएको उनी बताउँछन् ।

लेखक भारतीले भनेका छन्, ‘वर्ष २०१५ मा इन्डियन मोशन पिक्चर प्रोड्यूसर एसोसिएशनमा फिल्मको रजिस्टर गरिएको थियो । त्यसबेलादेखि म फिल्मको स्क्रिप्टमा काम गरिरहेको थिएँ । मैले फक्स स्टार स्टूडियोलाई पनि अप्रोच गरेको थिएँ, तर विभिन्न कारणले हुन सकेन । त्यसपछि मैले फिल्मको आइडिया र कहानी प्रोडक्सन हाउसलाई सुनाएँ, जसमाथि ‘छपाक’ बनेको छ ।

आफ्नो आइडिया फिल्ममा प्रयोग गरेको थाहा पाएपछि राकेशले फिल्मको निर्मातासँग पनि कुरा गरेका थिए रे । तर, निर्माताले आफ्नो कुरा सुने पनि नसुनेझैँ गरेपछि आफूले कोर्टको ढोका ढकढकाएको उनी बताउँछन् । राकेशले फिल्म ‘छपाक’ मा राइटरको रुपमा क्रेडिट दिन कोर्टमा आग्रह गरेका छन् । साथै, फिल्मको प्रदर्शनमा रोक लगाउन पनि उनले माग गरेका छन् ।

मेघना गुलजार निर्देशित फिल्म ‘छपाक’ एसिड अट्याक सर्वाइभर लक्ष्मी अग्रवालको जिन्दगीमाथि आधारित भएर निर्माण भएको हो । यसमा दीपिका मालती नामकी एक साधारण युवतीको भूमिकामा छन्, जोमाथि केही युवकले एसिड प्रहार गर्छन् । १० जनवरी २०२० मा रिलिज हुने फिल्ममा विक्रान्त मेसीको पनि अभिनय छ । फिल्मको ट्रेलर सार्वजनिक भैसकेको छ ।

हेर्नुहोस् ट्रेलर


  •  
  •  
  •