काठमाडौं ।
तपाईंको सवारी चालक लाइलेन्स, रुट परमिट कागजात र सवारी किताब (ब्लुबुक) प्रहरीले लिएको छ ? वा प्रतिलिपि लिएर तपाईं सवारीसाधन चलाउँदै हुनहुन्छ, होसियार जति बेला पनि सुन्न सक्नुहुन्छ, तपाईंसँग सवारी साधन चलाउने कुनै वैधानिकता छैन ।
विभिन्न कारबाहीमा परि ७ वर्षदेखि महानगरीय ट्राफिक प्रहरी महाशाखामा थन्किएका १५ हजारभन्दा बढी लाइसेन्स, रुट परमिट कागजात र सवारी किताब प्रहरीले खारेजीको लागि यातायात व्यवस्था विभागलाई सिफारिस गरेको छ । मोटरसाइकल, बस, माइक्रोबस, ट्रकलगायत सवारीचालक वा धनीको कागजात खारेजीका लागि सिफारिस गरेको हो ।
महाशाखाका डीआईजी प्रकाश अर्यालले विभिन्न कारबाही परेकाहरूको प्रहरीले कागजात लिए पनि पुनः लिन नआएकाहरूको खारेजीका लागि सिफारिस गरेको जानकारी दिए । उनका अनुसार प्रहरीले १० हजार ४ सय ४६ लाइसेन्स, १५ सय ६५ सवारी किताब (ब्लुबुक) र १५ सय ७६ रुट परमिट -बाटो इजाजत) प्रमाणपत्र खारेजका लागि सिफारिस गरेको हो । ‘यातायात व्यवस्था विभागसँग समन्वय भइसकेको छ,’ उनले भने, ‘कारबाहीमा परेकाहरूको कागजात खारेजी हुन्छ, गल्ती गर्नेले अर्को प्रमाणपत्र बनाएर चलाउन पाइन्छ भन्ने मानसिकता अब त्याग्नुपर्छ ।’
पुरानै लाइसेन्सबाट प्रतिलिपि निकालिएका छन् भने तत्काल जरिवाना तिरी नचलाए स्वतः खारेज हुने उनले बताए । सवारीसाधन गलत साइडबाट चलाएको, एकतर्फी सडक वा विपरीततर्फ चलाएको, सवारीसाधनको अवस्था ठीक नभएको, ट्राफिक संकेत वा इसारा उल्लंघन गरी सवारीसाधन चलाएका चालकले कारबाहीमा परि प्रहरीलाई कागजात बुझाएर लिन बेवास्ता गरेकालाई खारेज गर्ने उनले बताए । अपराध गर्नेलाई कानुनले उन्मुक्ति दिँदैन भन्ने यो राम्राे उदाहरण भएको उनले बताए ।
कागजात लिन पहिलोपटक सार्वजनिक सूचना जारी गर्ने हो कि भन्ने पनि विभागसँग छलफल भइरहेको उनले बताए । ऐनअनुसार निलम्बन गरिएको अवधिसम्म पनि जरिवाना नबुझाए अधिकारप्राप्त व्यक्तिले लाइसेन्स, रुट परमिट, ब्लुबुक खारेज गर्न सक्ने प्रावधान छ ।
कान्तिपुरबाट
