को हुन स्विस बैंकमा पैसा राख्ने हैसियतका नेपाली ?

572
  •  
  •  
  •  

स्विस बैंकमा नेपालीको पैसा रहेको चर्चा यस पटकको मात्रै होइन । कहिले पम्फादेखी ठकुरीले स्विजरल्याण्डको बैंकमा पैसा लुकाएको चर्चा हुन्थ्यो त कहिले ठूला व्यवसायीक घरानाको । कतिपयले पम्फादेवीलाई स्व. रानी ऐश्वर्यासँग जोडे । तर, वास्तविकता कहिल्यै बाहिर आएन । २०४६ सालमा राजनीतिक दलहरुलाई आन्दोलन चर्काउन चाँही पम्फादेवी ठकुरी ठूलै मसला थियो । देशको कमाई विदेशमा लुकाएको र त्यसलाई आफूहरुले फिर्ता ल्याउने चर्का भाषणको पुलिन्दा थियो पम्फादेवी र स्विस बैंक । सडकबाट सदनमा पुगेपछि राजनीतिक नेतृत्वले न त पम्फादेवी खोज्यो न त स्विस बैंक नै सम्झियो ।

पूर्व राजपरिवार र उनीहरुसँग सम्बन्ध जोडिएका उच्च घरानियाँहरुले स्विजरल्याण्डको बैंकमा पैसा लुकाएर राखेको चर्चा बेला बखत अझै हुने गरेको छ । पूर्व राजा स्व. वीरेन्द्र र उनका परिवारको नाममा रहेको सम्पति खोजविन गर्ने जिम्मेवारी पाएको नेपाल ट्रस्टले पनि वीरेन्द्र र उनका परिवारले विदेशमा लुकाएको एक सुक्को भेट्न सकेका छैन् ।

बरु, कहिल्यै शासनमा नरहेका र राजखान्दान वरपर पुग्न पनि नपाएका नेपाली व्यवसायीको पैसा स्विस बैंकमा रहेको तथ्यले पनि यस पटक बजार निकै तताएको छ । सरकारी निकाय, व्यवसायिक वृत र आमसञ्चार माध्यममा समेत गाढा परिचय नभएका १३ जना नेपाली व्यवसायीको नाममा स्विजरल्याण्डको एचएसबीसी बैंकमा ५ अर्ब ४० करोड रुपैयाँ लुकाइको तथ्य सार्वजानिक भएपछि उनीको पृष्ठभूमिका बारेमा सर्वत्र चासो व्यक्त गरिएको छ । आखिर को हुन त स्विस बैंकमा पैसा राख्ने हैसियतका नेपाली ?

नेपालीपत्रले यसअघि नै स्विस बैंकमा रहेको पैसा नेपाली व्यवसायीको मात्रै नभएको तथ्य सहितको सामग्री उपलब्ध गराइसकेको छ । स्विस बैंकमा पैसा राख्ने नेपालीको ब्रिटिश भर्जिनमा दर्ता रहेका कम्पनी र उनीहरुको अफसोर कारोबारका विषयमा त्यहाँ उल्लेख गरिएको छ । त्यसपछि हामीले उनीहरुको नेपाली व्यवसायीक पृष्ठभूमी खोज्ने प्रयास गरेका छांै । स्विस बैंकमा पैसा राख्ने नेपालीको यस्तो छ नेपालमा व्यवसायिक गतिविधि ः

१. विजेन्द्र जोशी


नेपाली व्यवासायीक वृतमा डब्लुडीएन भनेर चिनिने कम्पनी बल्र्ड डिस्टिव्युशन प्रालिमा संलग्न छन विजेन्द्र जोशी । यो कम्पनी २०५२ सालबाट नेपलामा सुरु भएको हो । अहिले उक्त कम्पनीले सिद्धिभवन कान्तिपथमा कर्पोरेट कार्यालय राखेर व्यवसाय सञ्चालन गरिरहेका छन् । उक्त कम्पनीले नेपाली बजारमा डेल, ओराकल, हुवावे, माइक्रोसफ्ट, तोसिवा, सिस्को, लगायत १७ वटा अन्र्तराष्ट्रिय ब्राण्डको नेपालका लागि आधिकारित विक्रेता हो । डब्लुडीएनको सिस्टर कम्पनीको रुपमा कम्युनिकेशन एण्ड कम्युनिकेट नेपाल प्रालि र नेपालसफ्ट सोलुसन प्रालि सञ्चालनमा रहेको छ । यी सबै कम्पनीले सूचना प्रविधि क्षेत्रमा काम गरिरहेका छन् ।

यी हुन डब्लुडीएनले नेपालमा काराेबार गर्ने सूचना प्रविधि क्षेत्रका विश्वस्तरीय ब्राण्ड

आइसी आइजेले उल्लेख गरे अनुसार डब्लुडीएनको अफसोर कम्पनी पोर्चल्युइस ट्रस्टनेट (विभिआई) लिमिटेड रहेको छ । उनीसँग विमलकाजी ताम्राकार, अरुण श्रेष्ठ, विश्वधर तुलाधर र नविन्द्र जोशीको व्यवसायिक संलग्नता रहेको छ । नेपालमा दर्ता रहेको डब्लुडीएन उनीहरुले ब्रिटिश भर्जिन आइल्याण्डमा पनि दर्ता गरेका छन् । उनीहरुले कम्पनीको नेपालको ठेगाना सिद्धिभवन कान्तिपथ, पोस्टबक्स नम्बर ११२९१, काठमाडौं नेपाल उल्लेख गरेका छन् ।

 २. विजेश कुमार तोदी अग्रवाल


स्विस बैंकमा पैसा भएका भनिएका नेपाली मध्येका विजेश कुमार तोदी अग्रवाल र हरिश कुमार तोदी दाजुभाई हुन । विराटनगरमा कपडाको व्यवासाय गर्ने उनीहरु २०६३ मा चर्केको मधेश आन्दोपछि भारत पलायन भएर उतै व्यवसाय सञ्चालन गरिरहेको नेपालकै एक व्यवसायीले बताए । ब्रिटिश भर्जिन आइल्याण्ड र सिंगापुरमा दर्ता रहेको वुडस्टक युनिभर्सल लिमिटेडमा उनी सन २००७ अगस्ट ३ देखि निर्देशक रहेका छन् । उक्त कम्पनीमा विन्दु तोदी पनि व्यवसायिक रुपमा संलग्न रहेकी छन । उनीहरुको पनि पोर्चल्युईस ट्रस्टनेट (विभिआइ) लिमिटेड अफसोर कम्पनीको रुपमा रहेको छ । त्यसैगरी, यूएसबी एजी, सिंगापुर मार्फत पनि उनीहरुको अफसोर कारोबार हुने गरेको छ । उनीहरुले नेपालको ठेगाना विराटनगर–९ मोरङ नेपाल उल्लेख गरेका छन् ।

३.विमलकाजी ताम्राकार


उनी पनि डब्लुडीएनमै संलग्न छन् । उनीसँग विश्वधर तुलाधर, नविन्द्र जोशी, विजेन्द्र जोशी, अनु श्रेष्ठ, व्यवसायीक रुपमा संलग्न छन । उनीहरुले पोर्चल्यूइस र हिमालयन इन्भेष्टमेन्ट ग्रुप लिमिटेड मार्फत अफसोर कारोबार गर्छन । हिमालयन इन्भेष्टमेन्ट ब्रिटिश भर्जिनमै दर्ता रहेको कम्पनी हो । उनीहरुको पनि नेपालको ठेगाना नेपालको ठेगाना सिद्धिभवन कान्तिपथ, पोस्टबक्स नम्बर ११२९१, काठमाडौं नेपाल उल्लेख गरिएको छ ।

४.बिनु श्रेष्ठ


विनु श्रेष्ठको ब्रिटिश भर्जिनमा दर्ता रहेको बेलउड एक्रिश लिमिटेड अफसोर कम्पनी रहेको छ । उनको नेपालको ठेगाना भने थैव वडा नं ७ ललितपुर हो । उनी सन २००५ अक्टोबर २१ देखि बेल उडमा निर्देशक र शेयर होल्डर छिन ।

५.विश्ववरसिंह थापा


विश्ववीरसिंह थापाले अफसोर कारोबार गर्ने दुई वटा कम्पनी रहेका छन् । हिमालयन इन्भेष्टमेन्ट ग्रुप लिमिटेड र पोर्चल्युइस ट्रस्टनेट (बिभिआई) लिमिटेड मार्फत उनले अफसोर कारोबार गर्छन । थापासँग यी कम्पनी मार्फत कारोबार गर्नेहरुमा विश्वधर तुलाधर, नविन्द्र जोशी र विमलकाजी ताम्राकार रहेका छन् । थापाले नेपालको ठेगाना सिद्धि सदन, नेपालटार, बालाजु काठमाडौं उल्लेख गरेका छन् । थापा सन २००३ डिसेम्बर २००३ देखि हिमालयन इन्भेष्टमेन्टमा शेयर होल्डर र निर्देशक रहेका छन् ।

६.विश्वधर तुलाधर


उनी पनि व्रिटिश भर्जिनमा दर्ता रहेको डब्लुडिएनमा संलग्न छन् । उनले पनि नेपालको ठेगाना कान्थिपथ, सिद्धि भवन नै उल्लेख गरेका छन् । उनीसँग डब्लुडिएन मार्फत अफसोर कारोबार गर्नेमा विमलकाजी ताम्राकार, नविन्द्र जोशी, विश्ववीरसिंह थापाले पोर्चल्युइस ट्रस्टनेट लिमिटेड मार्फत अफसोर कारोबार गर्छन् ।

७.डा. श्याम बहादुर कर्माचार्य


आइसीआइजेको रिपोर्ट अनुसार डा. श्याम बहादुर कर्माचार्य सर्जि इलेक्ट्रो मेडिका लिमिटेडको निर्देशक र शेयरधनि पनि हुन । उनको कम्पनी सन २००८ मा सिंगापुरका दर्ता रहेको देखिन्छ । उनीसँग मिलेर विदेशी साझेदारहरुले क्रेडिट स्विस, क्रोम्नि होल्डिङ, सक्सेफुल डेभलपमेन्ट होल्डिङ, राइट मुभ म्यानेजमेन्ट प्रोपर्टी, मलाया साउन अमेरिकन इन्भेष्टमेन्ट, बेस्टन ब पोइन्ट कर्पोरेशन, फच्र्युन रिच क्यापिटल लिमिटेड लगायतको कम्पनी सञ्चानल गरिरहेको देखिन्छ । यसमा नेपालको ठेगाना भने बागमति अञ्चल, ललितपुर उपमहानगरपालिका वडा नं २ देखिन्छ ।

८. हरिश कुमार तोदी


उनी विजेश कुमार तोदीका भाई हुन । उनी पनि अहिले भारतमा रहेर व्यवसाय सञ्चालन गरिरहेका छन । उनले दाजु विजेशकुमार तोदीसँग मिलेर पोर्टल्यूइस ट्रस्टनेट मार्फत अफसोर कारोबार गर्छन ।

९. प्रो. सत्यन्द्रकुमार गुप्ता


प्रोफेसर सत्येन्द्र कुमार गुप्ताले पनि स्विस बैंकमा अनधिकृत पैसा थुपारेको आइसीआइजेले उल्लेख गरेको छ । आइसीआइजेको रिपोर्ट अनुसार गुप्ता सन २००४ अप्रिल १ देखि वनका इन्टरनेशनल इंकका निर्देशक छन् । उक्त कम्पनीले प्रशस्त विदेशी प्राफेसर र डक्टरहरु साझेदार रहेको देखिन्छ । उनले नेपालको ठेगाना भने पोष्ट बक्स नं १५३५, काठमाडौ नेपाल राखेका छन् ।

१०. राजेन्द्र कुमार काबरा/रेखा काबरा


नेपालमा कागजको व्यवसाय गर्ने राजेन्द्र कुमार काबरा र उनकी श्रीमति रेखा काबराको नाम स्विस बैंकमा रकम थुपार्नेको सूचीमा समावेश छ । उनीहरुले नेपालमा चाहीँ ओम्नी इन्टरप्राइजेज मार्फत व्यवसाय सञ्चालन गरिरहेका छन् । राजेन्द्र कुमार काबरा प्mय्रागरेन्ज टाउन लिमिटेडमा सन २००९ अप्रिल ६ देखि शेयर होल्डर र निर्देशक छन् । उक्त कम्पनी पनि ब्रिटिस भर्जिनमै दर्ता छ । उक्त कम्पनीमा काबराकी श्रीमति रेखा काबराको पनि साझेदारी छ । उनलाई पनि कम्पनीको शेयर होल्डर र निर्देशकको रुपमा राखिएको छ । उनीहरुको हङकङमा क्रेडिट सुसी नामको कम्पनी रहेको आइसीआइजेले उल्लेख गरेको छ । उनीहरुले नेपालको ठेगाना शुक्रपथ ६/६०७, काठमाडौ नेपाल उल्लेख गरेका छन् ।

११. रेनुका प्रधान


उनको परिचय नेपालको व्यवासयिक वृतमा खासै गाढा छैन् । नेपालका ठूला व्यवसायिक घरानाले पनि उनलाई राम्ररी चिन्दैन । तर, आइजसी आइजेले भने रेनुका प्रधानको पनि स्विस बैंकमा पैसा रहेको उल्लेख गरेको छ । उनी पनि ब्रिटिश भर्जिनमा दर्ता रहेको वेस्टपार्क क्यापिटल इंक मार्फत अफसोर कारोवार गर्छिन भने उनीसँग पुनम प्रधान, अजय प्रसाद प्रधान र ग्रेसकोर्ट अफसोर इंकले कारोवार गर्छन । उनले नेपालको ठेगाना चुनदेवी ४ काठमाडौ नेपाल उल्लेख गरेकी छन् ।

२. शसिकान्त अग्रवाल

नेपालका प्रतिष्ठित व्यवसायी मानिने सशिकान्त अग्रवालको पनि स्विस बैंकमा अनधिकृत रुपमा पैसा राखेको भन्दै आइसीआइजेले नाम सार्वजानिक गरेको छ । उनी नेपालमा चिनी व्यवासायी संघका अध्यक्ष छन् । अर्थमन्त्री डा. रामशरण महतसँग निकै नजिकको हिमचिम भएका अग्रवाल नेपालमा एक पाँचतारे र अर्को ३ तारे होटलमा लगानी गर्दै छन् । काठमाडौंको नक्साल र ठमेलमा खुल्न लागेका उक्त दुई होटल अमेरिकाको आतिथ्य उद्योगमा निकै स्थापित ‘मेरियोट’ ब्राण्डमा खुल्न लागेका हुन् ।

आईसीआइजेका अनुसार अग्रवाल सन् २००३ देखि मल्टि लिंक ट्रेडिङ लिमिटेडको शेयर होल्डर र निर्देशक रहेका छन् । यो कम्पनी पनि ब्रिटिस भर्जिनमै दर्ता भएको छ । उनीसँग सुमित कुमार अग्रवाल पनि रहेका छन् । उनको नेपालको ठेगाना शिवकुन्ज, बत्तिसपुतली, काठमाडौं नेपाल राखिएको छ ।

कस्तो देश हो ब्रिटिश भर्जिन ?
दक्षिण अमेरिकी (क्यारेबियन) मुलुक ब्रिटिस भर्जिन आइल्याण्ड विश्वमै ‘ट्याक्स हेभन’को रुपमा परिचित छ । यहाँ जस्तोसुकै कम्पनी पनि सजिलै दर्ता गर्न सकिन्छ । बैंकमा पैसा जम्मा गर्दा पनि कुनै प्रमाण पेश गर्नु पर्दैन । ब्रिटिस भर्जिनमा कम्पनी दर्ता गरेर विश्वभर व्यवसाय गर्ने कम्पनी पनि उत्तिकै छन् । गैरकानुनी पैसाको कारोबार गर्ने महत्वपूर्ण गन्तव्यको रुपमा परिचित ब्रिटिस भर्जिन हातहतियार, लागुपदार्थ, सुन तथा हिराको व्यवसाय बढी हुने र त्यस्तो पैसा आतंकवादी गतिविधिमा समेत लगानी हुने स्थानको रुपमा पनि परिचित छ ।

साभार उद्धव थापा/नेपालीपत्रबाट


  •  
  •  
  •