अभिनेता आयुष्मान विश्‍वकै सय प्रभावशाली व्यक्तिको सूचीमा

115
  •  
  •  
  •  

काठमाडौं । बलिउड अभिनेता आयुष्मान खुराना टाइम्स म्यागजिनको विश्वकै सय सबैभन्दा प्रभावशाली व्यक्तिको सूचीमा परेका छन् । टाइम म्यागजिनले निकालेको सूचीमा कलाकार विधाबाट सन् २०२० का विश्वकै प्रभावशाली सय व्यक्तिमा अभिनेता आयुष्मान पनि परेका हुन् ।


उनले इन्स्टाग्राममा एक पोस्ट गर्दै आफ्ना प्रशंसकसँग खुसी साटेका छन् । उनले टाइम्सको सूचीमा आफू पर्नुलाई गर्वको कुरा रहेको बताएका छन् । उनलाई अहिले बलिउडकर्मीहरुले बधाई दिइरहेका छन् ।

‘टाइम्सले जुन पहिचान मलाई दिलाएको छ, त्यसप्रति कृतज्ञ छु । एक कलाकारको रुपमा मैले फिल्मको माध्यमबाट केही सकारात्मक पतिवर्तन ल्याउने प्रयास गरेको छु । यो पल मेरो जीवनका लागि निकै महत्त्वपूर्ण छ,’ आयुष्मानले इन्स्टामा अगाडि लेखेका छन्, ‘मलाई लाग्छ कि सिनेमा त्यो तागत हो, जसले कुनै पनि मुद्धालाई उठाएर सही विषयमा बहस पैदा गर्न सक्दछ ।’

त्यस्तै, अभिनेत्री दीपिका पादुकोणले आयुष्मानको तारिफ गर्दै टाइम्स म्यागजिनका लागि लेखेकी छन्, ‘फिल्म ‘विक्की डोनर’ बाट आयुष्मानले आफ्नो अलग पहिचान बनाएका छन् । उनले यादगार फिल्म र अनौठा किसिमका चरित्रबाट अलग छाप छाडेका छन् ।’ ‘विक्की डोनर’ बाट अभिनेताको रुपमा डेब्यू गरेका आयुष्मानलाई पछिल्लो समय बक्सअफिसको हिट मेशिन भन्ने गरिन्छ ।

त्यस्तै टाइमको सूचीमा पर्ने अन्य कलाकारमा सांगीतिक समूह ‘द विकेन्ड’, सेलेना गोमेज, जोजो सिवा, बोङ जून होलगायत रहेका छन् ।

त्यस्तै कोभिड–१९पछि विश्वभर चिनिएका अमेरिकाका वरिष्ठ संक्रामक रोग विशेषज्ञ डाक्टर एन्थोनी फौचीलाई टाइमले कोरोना नियन्त्रणका लागि नेतृत्वदायी भूमिका खेलेको भन्दै एक सय प्रभावशाली व्यक्तिको सूचीमा राखेको छ ।

नेतृत्व विधातर्फबाट अमेरिकी सिनेटर कमला ह्यारिस, ताइवानकी राष्ट्रपति साई इङ वेन, चिनियाँ राष्ट्रपति सी चिनफिङ, अमेरिकी राष्ट्रपति डोनाल्ड ट्रम्प, डेमोक्रेटिक नेता जो बाइडेन, जर्मन चान्सलर एन्जेला मर्केल र भारतीय प्रधानमन्त्री नरेन्द्र मोदीलगायतका व्यक्ति रहेका छन् ।

त्यस्तै भर्खर यूएस ओपन जितेकी टेनिस स्टार नाओमी ओसाका, अमेरिकी एथ्लिट एलिसन फेलिक्स, इजिप्टकी पत्रकार लिना अताल्लाहलगायत व्यक्ति पनि टाइमको सय प्रभावशाली व्यक्तिको सूचीमा परेका छन् ।


  •  
  •  
  •