एसियाडको सत्रौं संस्करण आजदेखि

121
  •  
  •  
  •  

काठमाडौं ३ असोज । एसियाली राष्ट्रहरूको सबैभन्दा ठूलो खेलमेला १७ औं एसियाली खेलकुद (एसियाड) शुक्रबारदेखि दक्षिण कोरियाको इन्चोनमा सुरु हुँदै छ। प्रतियोगिताको उद्घाटन शुक्रबार साँझ इन्चोन एसियाड स्टेडियममा हुने भएको छ। एसियाडको औपचारिक उद्घाटन शुक्रबार हुने भए पनि फुटबलका खेल भने भदौ २९ गतेदेखि नै सुरु भइसकेका छन्।

एसियाका ४५ राष्ट्रको सहभागिता रहने उक्त प्रतियोगितामा विभिन्न ३६ खेल समावेश गरिएको छ। प्रतियोगितामा कुल नौ हजार चार सय २९ जना खेलाडीले चार सय ३९ वटा स्वर्ण पदकका लागि प्रतिस्पर्धा गर्नेछन्। सहभागी खेलका लागि ४९ वटा खेलस्थल तयार पारिएको छ।

एसियाडमा २५ खेलमा भाग लिन लागेको नेपालबाट दुई सय चारजना खेलाडीले सहभागी हुँदै छन्। एसियाडमा सबैभन्दा बढी खेलाडी चीनले सहभागी गराएको छ। चीनले आठ सय ९४ खेलाडी इन्चोन पठाएको छ। दोस्रोमा आयोजक राष्ट्र दक्षिण कोरिया छ।

दक्षिण कोरियाले आठ सय ३३ जना खेलाडी समावेश गराउने भएको छ। एसियाडमा सबैभन्दा कम (११ जना) खेलाडी ब्रुनाईले सहभागी गराएको छ। भुटानले पनि १६ जना खेलाडी मात्र एसियाडमा सहभागी गराएको छ। एसियाडको समापन असोज १८ गते हुनेछ।

प्रतियोगितामा नेपालले टेबुलटेनिस, उसु, भारोत्तोलन, ट्रायथलन, बक्सिङ, जुडो, एथलेटिक्स, क्रिकेट, कुस्ती, ब्याडमिन्टन, साइक्लिङ, आर्चरी, गल्फ, लनटेनिस, सफ्ट टेनिस, पौडी, सुटिङ, बास्केटबल, फेन्सिङ, फुटबल, जिमन्यास्टिक, सेपाकताक्रो, कराँते, तेक्वान्दो र र्‍याफ्टिङ एन्ड क्यानोइङखेलमा सहभागिता जनाउनेछ। नेपालबाट दुई सय चारजना खेलाडी प्रतियोगितामा सहभागी छन्।


  •  
  •  
  •