आचारसंहिताले कलाकार मर्यादित बन्लान त ?

91
  •  
  •  
  •  

सम्झना गैरे, काठमाडौं, ३ भदौ (ओएनएस) : नेपालकी चल्तीकी अभिनेत्री रेखा थापाले गएको शिवरात्रीमा सार्वजनिक स्थानमा बसेर गाँजा तानिन् । नेपाली संचारमाध्यममा उनको तस्विरले विशेष स्थान पायो । कलिउडमा जमेकै बेला अभिनेता निखिल उप्रेतीले पहिली श्रीमती हुदाँहुदै संचितासँग हाँसीहासी विवाह गरे । प्रायः कलाकार सुटिङ स्पट होस् या सार्वजनिक स्थान चुरोट तानिरहेकै अवस्थामा भेटिन्छन् ।

nikhilमापसे चेकिङमा अधिंकाश कलाकारलाई प्रहरीले कारवाही गर्न समेत भ्यायो । कला क्षेत्रमा यस्ता घटना नौला होइनन् तर नेपाल चलचित्र कलाकारसंघले ‘बहुविवाह’ र ‘मद्यपान धुम्रपान’ गर्न नहुने भन्दै बल्ल आचारसंहिता जारी गर्न भ्याएको छ ।

संघले कलाकारको हितमा काम नगरेको भन्दै बिवाद खेपिरहेकै बेला आचारसंहिता जारी गरेको हो । कलाकारको हितका लागि भन्दै जारी गरिएको आचारसंहिताकाबारेमा अधिकांश कलाकारलाई जानकारी छैन् । अभिनेत्री करिश्मा मानन्धरलाई कलाकारका लागि जारी गरिएको आचारसंहिताका बारेमा तपाईको राय के छ ? भन्दै ओएनएसले सोधेको प्रश्नमा उनी अड्किइन् । ‘मलाई यसबारे खासै जानकारी छैन । जारी भयो रे भन्ने सुनेको छु, अब मिडिया मार्फत यसबारे जानकारी लिनु पर्ला ।’

नेपालकी चर्चित अभिनेत्रीलाई मात्र होईन अहिलेकी चल्तीकी अभिनेत्री शिल्पा पोखरेल समेत यसबारे अनविज्ञ छिन् ।rekha ‘यस्तो पनि भएछ । ठिकै छ नी कलाकारका लागि राम्रो कुरा हो यो ।’ भन्दै उनले यसबारेमा जान्ने उत्सुकता देखाइन् । जब ओएनएसले उनलाई कलाकारले बहुविवाह गर्न नपाउने रे नी भन्दा उनले भनिन्, ‘खै बहुविवाह गर्ने कलाकारलाई अझैसम्म कानुनले सजाय दिन सकेको छैन् ।’ भन्दै उनले निखिल र संचिताको प्रसंग उप्काइन् । ‘एउटी श्रीमती रुदै थिइन्, निखिल दाईले हास्दै संचितासँग विवाह गर्नु भो, खै नेपालको कानुनमा पनि बहुविवाह गर्नेलाई कारवाहीको व्यवस्था गरेको छ रे , उहाहरु त खुलेआम जीवन जिइरहनु भएको छ त ?’ उनले उल्टो प्रश्न गरिन् । एउटा असल कलाकारले आफ्नो जिम्मेवारी बुझेको हुन्छ भन्दै उनले थपिन्, ‘हामीलाई हेरेर दर्शकले सिको गर्ने भएकाले हामी त सजग हुनैपर्छ ।’

jharanaउता चलचित्र कलाकार संघमा सदस्य समेत रहेकी सुमिना घिमीरेलाई कलाकारसंघले निकै ठूलो काम गरेको दावी गर्छिन् । कलाकार पनि देश र समाजका लागि चिन्तित छन् भन्ने उदेश्यले सन्देशमूलक काम गरेको सुमिनाको भनाई छ । ‘आचारसंहिता हो कसैलाई जबरजस्ती गर्न त सकिदैन तर कलाकारसंघ कलाकारको घर हो, संस्कार घरभित्रैबाट सिक्ने हो’, भन्दै उनले नेपाली फिल्म उद्योगलाई बदनाम हुनबाट बचाउन यसो गरिएको दाबी गर्छिन् ।

सार्वजनिक स्थानमा धुम्रपान गरिएकै अवस्थामा कारवाहीमा समेत परिसकेका कलाकार दिपकराज गिरीलाई कलाकारसंघको आचारसंहिता खासै चित्त बुझेको छैन । ‘उठाइएका कुरा राम्राछन् तर चोरलाई कारवाही नहुने नेपाली समाजमा कसले मैले चोरी गरेको छु भन्दै सुध्रियला र ?’ उनलाई सार्वजनिक स्थानमा धुम्रपान मद्यपान गर्न नहुने कुरा त चित्त बुझेको छ तर नेपाली समाजनै धुम्रपानमा अगाडि भएकाबेला कानुनले रोक लगाउन नसकेको कुरालाई मुद्दा बनाएर बढाउनुको कुनै तुक देख्दैनन् उनी । ‘बहुविवाह गर्नेमा विश्वमै कलाकार अग्रपंक्तिमा पर्छन् । कानुनले रोक लगाउदा समेत बहुविवाहको दर बढेको बढ्यै छ । मानिस आफै संयमित भए, चाहिदैन आचारसंहिता भन्दै उनले संघले ‘लगनपछिको पोत’  जस्तो ढिलासुस्तीमा काम गरेको आरोप लगाए ।

garimaसंघका अध्यक्ष नवल खड्काका अनुसार कलाकारलाई मर्यादित बनाउन आचारसंहिता जारी गरिएको हो । ‘सबै क्षेत्रमा आचारसंहिता भएको तर कलाकारलाई मर्यादित बनाउने कुनै नियम नभएको भन्दै उनले आचारसंहिताको आवश्यकता महशुस गरेको ओएनएसलाई जानकारी दिए ।


  •  
  •  
  •