प्रधानमन्त्री रोजगार कार्यक्रम : आजदेखि बेरोजगार सूचीकरण गरिँदै

चैत महिनाभित्र वडा कार्यालयमा सूचिकृत हुन आग्रह
50
  •  
  •  
  •  

काठमाडौं, १ चैत(ओएनएस) : प्रधानमन्त्री रोजगार कार्यक्रम अन्तर्गत बेरोजगार युवालाई न्यूनतम् रोजगारीको अवसर प्रदान गर्न आजदेखि बेरोजगार सूचीकरण गरिँदैछ ।

सात सय ५३ स्थानीय तहमा स्थापना भएको रोजगार सेवा केन्द्रमा खटिइएका रोजगार संयोजकले बेरोजगार युवाको लगत संकलन गर्दैछन् ।

बेरोजगारलाई रोजगारीको अवसरसँग जोड्ने र रोजगार दिन नसके बेरोजगार भत्ता दिने सरकारको तयारी छ । सार्वजनिक विकास निर्माणका काममा योगदान गर्न इच्छुक बेरोजगारलाई चैत महिनाभित्र स्थायी बसोबास गर्दै आएको स्थानीय तहको वडा कार्यालयमा सूचिकृत हुन श्रम, रोजगार तथा सामाजिक सुरक्षा मन्त्रालयले आग्रह गरेको छ ।

सूचीकृत बेरोजगारलाई न्यूनतम रोजगारी सुनिश्चित गर्न व्यावसायिक कृषि, सिँचाइ, खानेपानी, नदी नियन्त्रण, वन, पर्यटन, यातायात पूर्वाधारलगायत सार्वजनिक निर्माणमा लगाउने तयारी सरकारको छ ।

बेरोजगारलाई एक आर्थिक वर्षभित्र न्यूनतम् एक सय दिनको रोजगारी दिने गरी सरकारले गत फागुन १ गतेबाट ‘प्रधानमन्त्री रोजगार कार्यक्रम’ कार्यान्वयनमा ल्याएको थियो ।


  •  
  •  
  •