खेलकुद मन्त्रीको सय दिने कार्ययोजना : सातै प्रदेशमा रंगशाला निर्माणदेखि ३७ वटा योजना

393
  •  
  •  
  •  

काठमाडौं, २३ चैत (ओएनएस) : युवा तथा खेलकुद मन्त्री जगतप्रसाद विश्वकर्माले एक सय दिनको आफ्नो योजना सार्वजनिक गरेका छन्। शुक्रबार पत्रकार सम्मेलनको आयोजना गरी उनले आफूले एक सयदिनमा गर्ने ३७ वटा कार्यको विवरण सार्वजनिक गरेका हुन्।

कार्ययोजनामा पूर्वाधार विकासका बुँदाहरु धेरै छन् । सबै परियोजना ताेकिएकै समयमा सम्पन्न हुने मन्त्री जविश्वकर्माले दावी गरे। मन्त्री विश्वकर्माले जनताप्रति जवाफदेही हुनेगरी काम गर्न सय दिनमा गर्ने प्रमुख कार्यहरु समेटिएको जानकारी दिए। उनले देशलाई समृद्ध बनाउने सरकारको प्रतिबद्धता पूरा गर्न पनि कार्ययोजना सार्वजनिक गर्नु परेको स्पष्ट पारे ।

लोकप्रियतालाई नभई काम गर्ने उद्देश्यले नै एक सय दिनमा गर्न सक्ने काममात्र आफूले सार्वजनिक गरेको र यसले खेल क्षेत्रमा आशा जगाउने उनको भनाइ थियो ।

उनले खेलाडी र खेलकूदको हितका लागि निजी क्षेत्रको पनि सहयोग लिँदै वैदेशिक लगानी भित्र्याउने तयारी गरिएको पत्रकार सम्मेलनमा जानकारी गराए।

नेपाल क्रिकेट संघ (क्यान) र मूलपानी क्रिकेट मैदानको जग्गासम्बन्धी समस्या समाधान गर्ने प्रतिबद्धता पनि उनको छ ।राष्ट्रिय खेलकूद परिषद्मा अहिले १८६ संघ दर्ता छन् ।

कार्य योजनामा मन्त्रालयको संगठन पुनःसंरचना, हाई अल्टिच्यूट स्पोर्टस्को अध्ययन, खेलकूदका राष्ट्रिय संघहरुको अभिलेख राख्ने, राष्ट्रिय खेलकूद नीति २०६७ परिमार्जन गर्ने, १२ वर्षे खेलकूद गुरुयोजना तर्जुमा गर्ने, पोखरा, तुल्सीपुर र इटहरीलाई स्पोर्टस् सिटीका रुपमा विकास गर्नेलगायतका विषय रहेका छन् ।

यस्तै, खेल प्रशिक्षक नभएको जिल्लामा कम्तीमा एकजना खेल प्रशिक्षकको व्यवस्था गर्ने, दशरथ रंगशाला परिसरमा खेलकूद अस्पताल निर्माणको शुरुआत गर्ने, प्रादेशिक रंगशालाको निर्माण गर्ने, सन् २०१९ मा हुने १३औँ दक्षिण एशियाली खेलकूद प्रतियोगिताका लागि आवश्यक पूर्वाधार निर्माण गर्ने, काठमाडौं उपत्यकाभित्र अन्तर्राष्ट्रियस्तरको रंगशाला निर्माणका लागि आवश्यक पर्ने जग्गाको पहिचान गर्ने, युवा संसद् अभ्यासको तयारी गरिने, १६५ निर्वाचन क्षेत्रमा युवा उद्यम कार्यक्रम सञ्चालन गर्नेलगायतका योजना रहेका छन्।

केपी ओलीको नेतृत्वमा नयाँ सरकार गठन भएको जेठ १३ गते १०० दिन हुँदैछ । यही समय भित्र गर्ने प्रमुख कामहरुको योजना शुक्रबार सार्वजनिक गरिएको हो । मन्त्री विश्वकर्माले ती कार्य योजना अनुसारको कामहरुको प्रगति विवरण जेठ १७ गते सार्वजनिक गर्ने घोषणा पनि गरे।


  •  
  •  
  •