१९ विधेयकलाई सुरुकै प्रक्रियाबाट संसदमा प्रवेश गराइदैँ

281
  •  
  •  
  •  

काठमाडौं, ११ चैत (अाेएनएस): १९ विधेयकलाई सुरुकै प्रक्रियाबाट संसदमा प्रवेश गराउने काम भइरहेकाे छ।अघिल्लो संसद्ले टुंग्याउन नसकेका विधेयकलार्इ फेरि सुरुकै प्रक्रियाबाट अघि बढाउनुपर्ने देखिएकाे संसद सचिवालयले जनाएकाे छ।

अन्य कानुनको मस्यौदासमेत नबनेको अवस्थामा निष्क्रिय रहेका विधेयक तत्काल प्रक्रिया अघि बढाएर संसद्लाई ‘बिजनेस’ दिन सकिने संसद् सचिवालयले सरकारलाई सुझाव दिएको छ । विधेयकलार्इ छिटाे भन्दा छिटाे तयार पारी परीत गराउनकाे लागि संसदीय समितिहरू पनि गठन भइसक्नेछन् ।

यसअघिका सरकारले संसद्मा मस्यौदा दर्ता गरेका १९ विधेयक अन्तिम टुंगो नलागेकाले निष्क्रिय अवस्थामा छन् । ‘अघिल्लो संसद्मा जुन अवस्थामा पुगे पनि अहिले ती विधेयक निष्क्रिय भइसकेका छन्,’ संसद् सचिवालयका प्रवक्ता भरतराज गौतमले भने, ‘निष्क्रिय विधेयक अब फेरि नयाँ प्रक्रियाबाट अघि बढाउनुपर्ने हुन्छ ।’

संसद् सचिवालयका अनुसार अदालतको अपहेलनासम्बन्धी विधेयक, राष्ट्रिय सुरक्षा परिषदको काम, कर्तव्य, अधिकार र कार्यविधि व्यवस्था गर्न बनेको विधेयक, राष्ट्रिय चिकित्सा शिक्षासम्बन्धी विधेयक, लोकसेवा आयोगको काम, कर्तव्य र अधिकारका सम्बन्धमा व्यवस्था गर्न बनेको विधेयक, ख्वप: विश्वविद्यालयसम्बन्धी विधेयक र सामाजिक व्यवहार सुधारसम्बन्धी विधेयक निष्क्रिय भएका हुन् ।

नेपाल स्काउट दोस्रो संशोधन विधेयक, नेपालगन्ज विश्वविद्यालय, नेपाल पशुचिकित्सा परिषद् ऐन २०५५ लाई संशोधन गर्न बनेको विधेयक, निजी सुरक्षा सेवा व्यवसाय गर्ने, यातना तथा निर्मम, अमानवीय वा अपमानजनक व्यवहार (नियन्त्रण) विधेयक पनि अघिल्लो संसद्बाट टुंगिएनन् ।

यस्तै, भूमिगत जलस्रोतको संरक्षण तथा नियमन गर्न बनेको विधेयक, सिँचाइ सम्बन्धमा व्यवस्था गर्न बनेको विधेयक, वनस्पति स्रोतको सम्बन्धमा व्यवस्था गर्न बनेको विधेयक, पूर्वपदाधिकारीलाई सुविधा प्रदान सम्बन्धमा व्यवस्था गर्न बनेको विधेयक, संघीय लेखा परीक्षण विधेयक र जातीय भेदभाव, छुवाछूत कसुर र सजाय पहिलो संशोधन विधेयक अब फेरि सुरुकै प्रक्रियाबाट अघि बढाउनुपर्ने हुन्छ ।


  •  
  •  
  •