१८ दलले भने, ‘प्रधानमन्त्री ओली’

काठमाडौँ, १८ असोज(ओएनएस) : १८ दलले तीन दललाई भद्र सहमति अनुसार अगाडि बढ्न सुझाव दिएका छन् । सोमबार प्रधानमन्त्री सुशील कोइरालाले आव्हान गरेको सर्वदलीय बैठकमा सहभागी दलले तीन दलबीच भएको भनिएको ‘भद्र सहमति’अनुसार एमाले अध्यक्ष केपी ओलीलाई प्रधानमन्त्री बनाएर अगाडि बढ्न तीन दललाई सुझाव दिएका हुन् ।

बैठकमा अन्य दलले तीन दलबीच भएको भद्र सहमति र भावी प्रधानमन्त्री को हुने भन्ने लगायतका विषयमा जिज्ञासा राखेपछि बैठकमा सहभागी एमाओवादी अध्यक्ष पुष्पकमल दाहाल प्रचण्डले संविधान जारी भएपछि केपी ओली नै प्रधानमन्त्री बन्ने भद्र सहमति भएको जानकारी दिएका छन् ।

प्रचण्डले संविधान जारी गर्ने बेलामा तीन दलबीच कांग्रेस नेतृत्वमा संविधान जारी गर्ने र संविधान जारी गरेपछि एमाले नेतृत्वमा सरकार गठन गर्ने भद्र सहमति भएको जानकारी गराएका थिए ।

प्रधानमन्त्री सुशील कोइरालाले आफू फेरि प्रधानमन्त्री बन्नका लागि लागिरहेको भन्ने टिप्पणी गलत भएको बताएका छन् । प्रधानमन्त्री कोइरालाले सहमति, सहकार्य र एकताबाटै अघि बढ्नुपर्छ भन्नेमा आफू अडिग रहेको बताएका थिए । प्रधानमन्त्री कोइरालाले संविधान जारी भएपछि एमाले नेतृत्वमा सरकार गठन गर्न सहमति गरेको तर सो सहमति पार्टीलाई जानकारी नगराएको बताएका थिए ।

बैठकमा व्यवस्थापिका संसदमा प्रतिनिधित्व गर्ने १८ दलको सहभागिता थियो । उनीहरूले अहिलेको नाकाबन्दी, बन्दलगायतको सामना गर्न तीन दलबीचको एकता आवश्यक रहेको अधिकांश दलले सुझाव दिएका छन् ।

बैठकमा तराईमा जारी आन्दोलन सम्बोधन गर्न तत्काल वार्ता अगाडी बढाउने बिषयमा भने सहमति भएको छ । तराईमा लामो समयसम्म जारी आन्दोलनले जनजीवन कष्टकर भएको भन्दै तत्काल समस्या समाधानमा जोड दिनुपर्नेमा सबै दल सहमत भएका थिए ।