बिहीबार, भाद्र ८, २०७४ | Thursday, August 24, 2017
न्युज अपडेट

उपेन्द्र यादवको भावुक टिप्पणी, ‘माटोको मायाले निर्वाचनमा आएँ’

‘एमाले संशोधनमा बाधक बन्दैन’

उपेन्द्र यादवको भावुक टिप्पणी, ‘माटोको मायाले निर्वाचनमा आएँ’

काठमाडौं, २९ वैशाख (ओएनएस) : स्थानीय तहको निर्वाचन बिथोल्ने रणनीति त्यागेर भोट माग्न हिँडेका मधेसवादी दलका नेताहरुको लवज फेरिन थालेको छ । अझ संयुक्त लोकतान्त्रिक मधेसी मोर्चा एवं संघीय गठबन्धनको संयोजकको जिम्मेवारीबाट अन्य ६ दलका नेताहरुबाट निकालिएका उपेन्द्र यादवले भावुक टिप्पणी गरेका छन् ।

संघीय समाजवादी फोरमका अध्यक्ष यादवले राजधानीमा आयोजित एक साक्षात्कार कार्यक्रममा भने, ‘मैले आफू जन्मेको भूमिलाई सम्झिएँ, निर्वाचनबाट मुलुकलाई अघि बढाउन सकिन्छ भन्ने सोचेर निर्वाचनमा सहभागी हुने निर्णय गरेको हुँ ।’

साथै आइतबार हुने पहिलो चरणको निर्वाचनमा उल्लेख जनसहभागिता हुने विश्वास व्यक्त गरे । उनले भने, ‘निर्वाचनमा नजाँदा किन गइनस्  भन्छन् । निर्वाचनमा भाग लिँदा किन सहभागिता जनाइस् भन्छन् रु यो कस्तो प्रश्न होला, बडा विचित्र छ ।’

आन्दोलनबाट प्राप्त भएका उपलब्धिलाई संस्थागत गर्न पनि निर्वाचनमा जानुको विकल्प नभएको देखेपछि चुनावमा जाने अपर्झट निर्णय लिएको उनले बताए ।

निर्वाचनमा भाग लिएपनि आफ्नो पार्टीले कुनै मुद्दा नछोडेको यादवको दाबी छ । उनले भने, ‘निर्वाचनमा भाग लिनु भनेको जनतामा जानु हो, यो पनि एउटा संघर्ष नै हो ।’

फोरम अध्यक्ष यादवले आफूहरुले उठाएका मुद्दा सम्बोधन गर्न सरकारले परिमार्जनसहित संविधान संशोधन विधेयक सदनमा अघि बढाएकोले पारित हुने विश्वासका साथ आफ्नो पार्टी स्थानीय चुनावमा होमिएको जिकिर गरे । सरकारले सहमति अनुसार १७ गते नै संशोधन प्रस्ताव पारित गराउने प्रयास गरेको भए पनि राप्रपाका १० सांसद गायब भएकोले पारित हुन नसकेको स्पष्ट पारे ।

अब जेठ ४ गतेको लागि संसद बैठक बोलाएको भन्दै उनले सकेसम्म त्यही दिन नभए त्यही आसपासमा संशोधन प्रस्ताव पारित हुने समेत विश्वास व्यक्त गरे । यादवले भने, ‘मलाई विश्वास छ, संशोधन प्रस्ताव पारित हुन्छ ।’

साथै संशोधन प्रस्ताव पारित गराउनको लागि प्रमुख प्रतिपक्षी दल नेकपा एमालेले पनि सहयोग र समर्थन गर्ने विश्वास लिए । उनले थपे, ‘एमाले संशोधनमा बाधक बन्दैन ।’

Comments are closed.

'
Scroll To Top